ევროპის ქვეყნებმა თავად შექმნეს პირობები იმისათვის, რომ მიგრანტები ნაკადი მათ საზღვრებთან შეკრებილიყო,  - განაცხადა რუსეთის პრეზიდენტმა ვლადიმირ პუტინმა პოლონეთ-ბელარუსის საზღვარზე შექმნილი სიტუაციის შესახებ საუბრისას.

 „ისინი თავად არიან დამნაშავეები. მე ვთქვი რატომაც: პოლიტიკური, სამხედრო და ეკონომიკური თვალსაზრისით. თავად შექმნეს პირობები იმისათვის, რომ ათასობით და ასობით ათასი ადამიანი იქით წასულიყო. ახლა კი ეძებენ დამნაშავეებს, რათა მიმდინარე მოვლენებზე პასუხისმგებლობა მოიხსნან“, - განაცხადა ოკუპანტი ქვეყნის პრეზიდენტმა ტელეარხ „როსია 1“-ის გადაცემაში. ამასთან, მან გაკვირვება გამოთქვა „აეროფლოტის“ მიმართ ევროკავშირის მხრიდან შესაძლო სანქციების დაწესების შესახებ.

„რა შუაშია აქ ჩვენი „აეროფლოტი“? ერთმა თვითმფრინავმა მაინც გადაიყვანა ვინმე? (მიგრანტები ბელარუსში). აზრზე არ  ვარ, მაგრამ ალბათ, ვიღაცამ შეძლო რომელიმე თვითმფრინავით სარგებლობა და მესამე ქვეყნის მეშვეობით გადასვლა. და ჩვენ აქ რა შუაში ვართ?  კიდევ ერთხელ ვიმეორებ: ეს არის პასუხიმსგებლობის თავიდან არიდება იმ მოვლენებზე, რაც დღეს მიმდინარეობს“, - აღნიშნა პუტინმა.

შეგახსენებთ, ევროკავშირში განაცხადეს, რომ სანცქიები, რომლის შემოღებასაც მიგრაციული კრიზისის გამო მომავალი კვირიდან გეგმავენ, რუსულ ავიაკომპანია „აეროფლოტსაც“ დაუწესდება.

8 ნოემბერს, მიგრანტების მრავალრიცხოვანი ჯგუფი ახლო აღმოსავლეთისა და აფრიკის ქვეყნებიდან, ბელარუს-პოლონეთის საზღვარს მიაწყდა.  გარკეულმა ჯგუფებმა პოლონეთის ტერიტორიაზე შეჭრა სცადეს. ამჟამად, საზღვართან 2 ათასამდე ლტოლვილი იმყოფება და ევროკავშირის ქვეყნებში შეღწევას ცდილობს. მათ პოლონეთის საზღვრის პირას გაშალეს კარვები და ტერიტორიის დატოვებას არ აპირებენ.