საქართველოს მესამე პრეზიდენტის, მიხეილ სააკაშვილის ადვოკატის, შოთა თუთბერიძის განცხადებით, ექიმთა კონსიულიუმი გლდანის მე-18 სამკურნალო დაწესებულებაში არ შეუშვეს.

როგორც ადვოკატი განმარტავს, სპეციალურმა პენიტენციურმა სამსახურმა კონსილიუმის არშეშვების არგუმენტად არასამუშაო საათები დაასახელა.

მანამდე ექიმთა კონსილიუმი სამკურნალო დაწესებულებაში შესვლის თანხმობას ორი საათის განმავლობაში ელოდა.

"დღეს ვგეგმავდით კონსილიუმის შესვლას პრეზიდენტის მოსანახულებლად, თუმცა 2-საათიანი ლოდინის შემდეგ, პენიტენციურმა სამსახურმა უარი თქვა შეშვებაზე არასამუშაო საათების მიზეზით. ეს ფაქტი ასახვას ჰპოვებს საერთაშორისო გადაწყვეტილებებში. ჩვენ ყველაფერს გავაკეთებთ, კიდევ ვცდით შესვლას, მაგრამ არ ვიცით, რა იქნება ხვალ", - აღნიშნა ადვოკატმა.

მანამდე გავრცელებული ცნობით, მიხეილ სააკაშვილი მზადყოფნას გამოთქვამდა, შეხვედროდა ექიმთა კონსილიუმის შემადგენლობას.