"ნაციონალური მოძრაობის" წარმომადგენლის ეკა ხერხეულიძის განმარტებით, საქართველოს მესამე პრეზიდენტმა მე-18 სამკურნალო დაწესებულებაში ნიკა გვარამიას და უკრაინის კონსულის მისვლა ითხოვა.

ხერხეულიძის თქმით, მიხეილ სააკაშვილი ერთხელ უკვე მოატყუეს და ახლა სააკაშვილს სურს, რომ გორის ჰოსპიტალში გადაყვანის პროცესს სწორედ გვარამია და უკარინის კონსული დააკვირდნენ.

"ჩემთვის ძალიან მნიშვნელოვანია მან დაუყოვნებლივ მიიღოს შიმშილობის შეწყვეტის გადაწყვეტილება და რა გარემოებაც შეუწყობს ამას ხელს, შევეცდები მას ჩემი პოზიცია გავუზიარო და დავარწმუნო, მაგრამ ეს ადამიანი იბრძვის 50 დღეა უთანასწორო ბრძოლაში და მისი თავგანწირული ბრძოლა იმსახურებს იმას, რომ მისი პოზიცია ჩვენ ვიცოდეთ...

არც ერთ შემთხვევაში თავისი ნებით მიხეილ სააკაშვილი აქედან არ გადავა, სანამ მისი პოზიცია არ იქნება ცნობილი საზოგადოებისთვის, იმ საზოგადოებისთვის, რომელიც იცდის რუსთაველზე, იმ ადამიანებისთვის რომლები შიმშილობენ" - ამბობს ხერხეულიძე.

ცოტა ხნის წინ, იუსტიციის მინისტრმა მიხეილ სააკაშვილს გორის ჰოსპიტალში გადაყვანა შესთავაზა. ამ დროისთვის, სააკაშვილის პოზიცია უცნობია.