რასაკვირველია, მიხეილ სააკაშვილის ოჯახს ურჩევნია, რომ მან რეაბილიტაცია შვეიცარიის რომელიმე კურორტზე გაიაროს, მაგრამ მას ყველა სამედიცინო მომსახურება გააჩნია, რაც არ გააჩნდათ სხვებს, – განაცხადა საქართველოს პარლამენტის პირველმა ვიცე-სპიკერმა გია ვოლსკიმ.

მისი თქმით, სააკაშვილის დროს მიღებული კოდექსით რომ ეხელმძღვანელა ხელისუფლებას, მას ციხეში 30 წელზე მეტი ხნის გატარება მოუწევდა.

"მიხეილ სააკაშვილის მიმართ გამოტანილია განაჩენები, მათ შორის სტრასბურგის სასამართლოს ვერდიქტი. დანაშაულები არის უმძიმესი და მიხეილ სააკაშვილის დროს მიღებული „სისხლის სამართლის კოდექსით“ რომ გვეხელმძღვანელა, მას ციხეში 30 წელზე მეტის გატარება მოუწევდა.

ჯანმრთელობის დაცვის თვალსაზრისით ყველანაირი მომსახურება აქვს და თუ სასამართლოს რომელი გადაწყვეტილებაზე ფიქრობენ, რომ არასამართლიანია, საერთაშორისო სასამართლო არსებობს. ვერავინ უარყოფს, რომ „იმედი“ სასტიკი მეთოდით არ დაარბიეს. თუ ამის უარყოფა ან იმის დამტკიცება შეიძლება, რომ სააკაშვილმა არაფერი იცოდა, რასაკვირველია, არა მხოლოდ ამერიკა, არამედ ქართული საზოგადოების დიდი ნაწილი იტყვის, რომ სააკაშვილი უდანაშაულოა, მაგრამ ეს ყველაფერი ვიხილეთ. უამრავი ადამიანი ვიცით, ვინც მის მიერ შექმნილ რეჟიმს სიცოცხლე და ჯანმრთელობა შესწირა“, – განაცხადა გია ვოლსკიმ.