რუსეთის საგარეო საქმეთა მინისტრი სერგეი ლავროვო ამბობს, რომ იმედი აქვს, უკრაინა საქართველოს ექს-პრეზიდენტ მიხეილ სააკაშვილის გზას არ დაადგება. მან ამის შესახებ პრეს-კონფერენციაზე განაცხადა.

 „იმედი მაქვს, რომ უკრაინის ახლანდელი ხელისუფლება არ დაადგება მიხეილ სააკაშვილის გზას და 2008 წლის აგვისტოს მაგალითს არ გაიმეორებს“, - განაცხადა ლავროვმა.

შეგახსნებთ, სერგეი ლავრივმა განაცხადა, რომ ჩრდილოატლანტიკური ალიანსი რუსეთის საზღვრებთან სამხედრო ტექნიკას ანთავსებს.

 „ჩვენი საზღვრების სიახლოვეს ნატო-ს ქვეყნების, მათ შორის ამერიკისა და ბრიტანეთის, საბრძოლო ტექნიკისა და დანაყოფების გადასროლა ხდება. უკრაინაში, დონბასში, შეხების ხაზზე აკუმულირებულია სულ უფრო მეტი ძალები და საშუალებები დასავლელი ინსტრუქტორების მზარდი რაოდენობის მხარდაჭერით“, - განაცხადა ლავროვმა.

მისი თქმით, დასავლეთის ქვეყნები ახდენენ ანტირუსული ქმედებების პროვოცირებას და მისივე თქმით, კიევი, შესაძლოა, „სამხედრო ავანტიურაზე წამოაგონ.“

ამასთან, ლავროვი აცხადებს, რომ დიდი ხანია დასავლეთი აქეზებს სხვა სახელმწიფოებს ანტირუსული ქმედებებისკენ. „ნატო-ში პოსტსაბჭოთა ქვეყნების ჩათრევა ამისი ნათელი მაგალითია“, - ამბობს ლავროვი. მისი თქმით, ალიანსმა და მისმა მოკავშირეებმა ძალიან კარგად იციან ამ ქვეყნების მიმართ მოსკოვის დამოკიდებულება.

ცოტა ხნის წინ, უკრაინის სამხედრო დაზვერვის ხელმძღვანელმა გამოცემა Military Times-ს განუცხადა, რომ რუსეთმა უკრაინის საზღვრებთან 92 ათასზე მეტი სამხედრო განათავსა და იანვრის ბოლოს ან თებერვლის დასაწყისში უკრაინაზე თავდასხმისთვის ემზადება.

ამასთან, აშშ-ის დაზვერვის წარმომადგენლებმა მოკავშირეები გააფრთხილეს, რომ ძალიან ცოტა დრო დარჩა იმისთვის, რომ რუსეთს ხელი შეუშალონ უკრაინის ტერიტორიაზე შეჭრაში.