დაჯექი, ორიანი, - ასე მიმართა კახა კალაძემ საკრებულოს სხდომაზე "ერთიანი ნაციონალური მოძრაობის" წევრ, ირაკლი ნადირაძეს.

დედაქალაქის საკრებულოს სხდომაზე ნადირაძე კალაძეს აკრიტიკებდა და მას კითხვებს უსვამდა ისეთ საკითხებზე, რომელიც კორუფციის ეჭვებს ბადებდა.

"თქვენ ბრძანეთ, რომ აპირებთ მომავალ წელს ავტობუსების ყიდვას, ბიუჯეტის პროექტშიც არის ჩადებული, მე მაინტერესებ შემდეგი ტენდერიდან რამდენი მილიონი ლარის მოპარვას აპირებთ. წინა მერობის პერიოდში თქვენს ნათლიმირონ წულაიას ვარკეთილში, მესამე მასივში 16 მილიონის ქონება გადაეცით ერთ ლარად. მე მაინტერესებს ამ მერობის პერიოდში რამდენი მილიონის ქონება უნდა გადასცეთ თქვენს ნათლიმირონებს. ასევე ბატონო, წინა მერობის პერიოდში, თქვენ მეგობარ ბექა ოდიშარიას 200 ათასი ლარის ქონება გაუცვალეთ 5-მილიონლარიან ქონებაში, ასევე, თქვენი კომოს ტბის ძმაკაცებს", - განაცხადა ირაკლი ნადირაძემ

ამასთან, კალაძემ ენმ-ის წევრ ლევან ხაბეიშვილს "ჯამბაზი" უწოდა და თქვა, რომ ლევან ხაბეიშვილი, საკრებულოს ნომერ პირველი ჯამბაზი, ირაკლი ნადირაძემ ჩაანაცვლა".

„ჩვენ გვაქვს ძალიან კარგი მოცემულობა. ლევან ხაბეიშვილი, საკრებულოს ნომერ პირველი ჯამბაზი, ჩაანაცვლა ირაკლი ნადირაძემ. ასე რომ, მივცეთ იმის შესაძლებლობა და საშუალება, რომ გავერთოთ“, თქვა კახა კალაძემ.

საკრებულოს სხდომაზე დღეს, 7 დეკემბერს თბილისის მთავრობის დამტკიცებას განიხილავენ.