ეს შიმშილობის აქცია არის თავად სააკაშვილის დაშინებით და მოთხოვნით წამოწყებული. როგორც ჩანს, ის სჯის თავის მომხრეებს, - განაცხადა კულტურის, სპორტისა და ახალგაზრდობის მინისტრმა თეა წულუკიანმა  ენმ-ს მასობრივ საპროტესტო შიმშილობაზე.

"ჩვენ როგორც გვესმის და რასაც ვხედავთ, ეს შიმშილობის აქცია არის თავად სააკაშვილის დაშინებით და მოთხოვნით წამოწყებული. როგორც ჩანს, ის სჯის თავის მომხრეებს, თავის პარტიას, პოლიტიკოსები იქნებიან ისინი თუ გულმხურვალე, ასე ვთქვათ, მათი მხარდამჭერები. საკუთარი ინტერესიდან გამომდინარე, არ ერიდება უკვე სხვა ადამიანების ჯანმრთელობის დაზიანებას და რაც ყველაზე მნიშვნელოვანია, ასევე ამ ადამიანების იძულებას, რომ იცხოვრონ ილუზიასა და ვირტუალურ რეალობაში, მაგრამ არანაირი ამ ტიპის პროტესტი არ არის პერსპექტიული," - თქვა წულუკიანმა.

მიხეილ სააკაშვილის გათავისუფლების მოთხოვნით "ნაციონალური მოძრაობის" ლიდერებმა, მხარდამჭერებმა და სამოქალაქო აქტივისტებმა საპროტესტო შიმშილობა დაიწყეს. პარტიის ოფისთან ათზე მეტია კარავია გაშლილი. ენმ-ის თავმჯდომარის, ნიკა მელიას თქმით, მასთან ერთად პროტესტის ამ უკიდურეს ფორმას 300-ზე მეტი ადამიანი მიმართავს.