"ქართული ოცნების" დეპუტატი, ალუდა ღუდუშაური NDI-ს მიერ ჩატარებული კვლევის შედეგებს აფასებს, რომლის თანახმადაც, მოსახლეობის დიდი ნაწილი უკმაყოფილოა მთავრობისა და პრემიერ-მინისტრის მუშაობით.

კვლევის შედეგების საპასუხოდ, ღუდუშაური აცხადებს, რომ ქვეყანას ჰყავს პატრიოტი, ვაჟკაცი, საქმეზე უაღრესად ორიენტირებული, ნამდვილად ღირსეული პრემიერი.

"დღეს ქვეყანას ჰყავს პრემიერი, ბატონი ღარიბაშვილის სახით, რომელიც არის პატრიოტი, ვაჟკაცი, საქმეზე უაღრესად ორიენტირებული და რაც ყველაზე მთავარია, ქვეყნის ინტერესების დამცველი ნამდვილად ღირსეული პრემიერი...

ამიტომ ის კვლევები, რომელზეც ჩვენ ვსაუბრობთ ერთია, მეორეა, ქვეყნის საზოგადოების და ამომრჩევლის განწყობა, რაც კარგად დავინახეთ და გამოჩნდა, სხვათა შორის, არც თუ ისე დიდი ხნის წინანდელ არჩევნებზე", - განაცხადა ღუდუშაურმა.

კვლევის თანახმად, გამოკითხულთა უმრავლესობა მთავრობის საქმიანობით უკმაყოფილოა. მთავრობის საქმიანობას დადებითად აფასებს 39 პროცენტი, ხოლო უარყოფითად 52 პროცენტი.

პრემიერ-მინისტრ ირაკლი ღარიბაშვილის საქმიანობას დადებითად აფასებს 27 პროცენტი, საშუალოდ ასევე 27 პროცენტი, უარყოფითად – 35 პროცენტი.