რუსი ოპოზიციონერი დმიტრი გუდკოვი საქართველოში არ შემოუშვეს. ის ამის შესახებ Facebook-ის პირად გვერდზე გავრცელებულ ვიდეოში საუბრობს.

მისი თქმით, თბილისში უკრაინიდან ოფიციალური მოწვევით ჩამოვიდა, თუმცა ქართველმა მესაზღვრეებმა არ შემოუშვეს.

„კიევიდან თბილისში ჩამოვფრინდი აქტივისტებთან შესახვედრად. მაქვს მოწვევაც. საზღვარზე მითხრეს, რომ უკან კიევში მოახდენენ ჩემს დეპორტირებას. სახელმწიფომ მიიღო გადაწყვეტილება არ შემიშვას ქვეყანაში. იმის მიუხედავად, რომ უამრავი შეხვედრა მაქვს დაგეგმილი, გადახდილი მაქვს სასტუმრო. ეს პირველი შემთხვევა არ არის, ახლახანს ლუბოვ სობოლი გააძევეს. საოცარი ამბები ხდება საქართველოში, მეგობრებო,“- აცხადებს რუსი ოპოზიციონერი.

დმიტრი გუდკოვი რუსეთის სათათბიროს ყოფილი დეპუტატი და პუტინის ერთ-ერთი მთავარი მოწინააღმდეგეა. ის რუსეთის ხელისუფლების რეპრესიების მსხევრპლი ხშირად გამხდარა. 

გუდკოვი რუსეთიდან უკრაინაში გასული წლის ივნისში გაემგზავრა. სახელმწიფო დუმის ყოფილი დეპუტატი არის ეჭვმიტანილი იჯარის ხელშეკრულების გადაუხდელობის საქმეზე. თავად პოლიტიკოსი აცხადებს, რომ მას ხელისუფლება პოლიტიკურად დევნის.