მელიას გულის ტკივილი უკავშირდებოდა იმას, რომ სააკაშვილს არც თავისუფალი სასამართლო ექნებოდა და არც წითელი ხალიჩები, - განაცხადა „ნაციონალური მოძრაობის“ წევრმა ლევან ხაბეიშვილმა ტელეკომპანია „იმედის“ მიერ გამოქვეყნებულ ვიდეომასალაზე, რომელშიც ნიკა მელია სააკაშვილის საქართველოში დაბრუნებაზე საუბრობს.

"საუბარი იყო იმაზე, რომ თუ სააკაშვილი ჩამოვიდოდა საქართველოში, აქ მას რუსული რეჟიმი დააპატიმრებდა და ეცდებოდნენ მისი ჯანმრთელობის, სიცოცხლის ხელყოფას. ამაზე სხვათა შორის, სააკაშვილი საუბრობდა, რომ მისი დასავლელი, ევროპელი მეგობრები ეუბნებოდნენ, რომ საქართველო არც ევროპაა და არც დემოკრატიული მიმართულებით ვითარდება, იქ არის რუსული რეჟიმი, კლანური სასამართლო, სადაც თქვენ გემუქრებათ პატიმრობა და შესაძლოა, სიკვდილით დასჯაც კი. ამიტომ ისინი აფრთხილებდნენ, რომ სააკაშვილი არ ჩამოსულიყო საქართველოში, რაც თავიდან ბოლომდე ცხადია, გააზრებული ჰქონდა პრეზიდენტ სააკაშვილსაც. ეს ისედაც ცხადი იყო, შესაბამისად, მელიას პოზიციაც სააკაშვილის ჩამოსვლასთან მიმართებით უკავშირდება იმას, რომ საქართველოში მას დახვდებოდა რუსული რეჟიმი.

მოგეხსენებათ, მსოფლიოში მოიძებნება მხოლოდ ორი ქვეყანა, სადაც სააკაშვილს ემუქრება თავისუფლების აღკვეთა ან რაიმე სხვა ზიანი. ეს არის რუსეთი და საქართველო, სხვაგან სააკაშვილს 9 წლის განმავლობაში პრობლემა არ შექმნია. მელიას გულის ტკივილი უკავშირდებოდა იმას, რომ სააკაშვილს არც თავისუფალი სასამართლო ექნებოდა და არც წითელი ხალიჩები“, – განაცხადა ლევან ხაბეიშვილმა.

"იმედის" მიერ გავრცელებულ ჩანაწერში ერთიანი ნაციონალური მოძრაობის თავმჯდომარე, ნიკა მელია ამბობს, რომ საქართველოში ექსპრეზიდენტის, მიხეილ სააკაშვილის ჩამოსვლას კატეგორიულად ეწინააღმდეგებოდა.