უკრაინის პრეზიდენტი ვოლოდიმირ ზელენსკი ევროპარლამენტის საგანგებო სესიაზე სიტყვით გამოვიდა.

ევროპელ კანონმდებლებს ზელენსკიმ ონლაინ ფორმატში მიმართა.

მისი განცხადებით, ის, რაც უკრაინაში ხდება, ტრაგედიაა.

"ჩვენ ვიბრძვით ჩვენი მიწის, თავისუფლებისა და სიცოცხლისთვის. ვერავინ გაგვტეხს, ჩვენ უკრაინელები ვართ", - თქვა ზელენსკიმ.

უკრაინის პრეზიდენტმა რუსეთის საზარელ დანაშაულებზეც ისაუბრა. მისი თქმით, რუსეთს უკრაინელი ბავშვები ჰყავთ მიზანში ამოღებული, "გუშინ 16 დაიღუპა".

ვოლოდიმირ ზელენსკიმ მოუწოდა ევროპარლამენტს, დაამტკიცოს, რომ უკრაინასთან ერთად არიან.

"დაამტკიცეთ, რომ უკრაინას არ განუდგებით, დაამტკიცეთ, რომ ნამდვილი ევროპელები ხართ", - მიმართა ზელენსკიმ ევროპის პარლამეტის დეპუტატებს.

ზელენსკის გამოსვლას ევროპარლამენტარები ოვაციებით შეხვდნენ. მანამდე კანონმდებლები, რომელთაც უკრაინის დროშით გაფორმებული მაისურები ეცვათ, უკრაინის ელჩს ფეხზე წამოუდგნენ.

დეპუტატებს და ზელენსკის სიტყვით მიმართა ასევე ევროპის პარლამენტის პრეზიდენტმა რობერტა მეცოლამ.

"ბატონო პრეზიდენტო გმადლობთ, რომ აჩვენეთ მსოფლიოს, რას ნიშნავს ფეხზე დგომა. გმადლობთ, რომ გაგვახსენეთ თუ რაოდენო საშიშია თვითკმაყოფილება", - თქვა მეცოლამ თავის გამოსვლაში, სადაც შეაქო უკრაინელი ხალხის გმირობა.

პრეზიდენტმა მეცოლამ ასევე აღნიშნა, რომ ევროპარლამენტი მიესალმება უკრაინის განაცხადს ევროკავშირის წევრობასთან დაკავშირებით.