ლიეტუვის ექსპრეზიდენტი დალია გრიბაუსკაიტე ნატო-ს მოუწოდებს უკრაინაში რუსეთის აგრესიის წინააღმდეგ ომში ჩაერთოს.

დალია გრიბაუსკაიტე აღნიშნავს, რომ მხოლოს სანქციები, რაც არ უნდა მკაცრი იყოს, პუტინს  ვერ გააჩერებს.

„მხოლოდ ომი გააჩერებს ომს. არ არის საჭირო თავის მოჩვენება და სინდისის დამშვიდება უკრაინისთვის მხოლოდ იარაღის მიწოდებით, ზედმეტად გვიანია. უკრაინელი ხალხი იბრვის ჩვენთვის... მანტრის გამეორება იმაზე, რომ ნატო-ს არ შეუძლია უკრაინის დახმარება, უკვე პათეტიკურად გამოიყურება და დასავლეთის სიმხდალეს ამხელს“, - აცხადებს გრიბაუსკაიტე.

მან აღნიშნა, რომ ამ ომში დამკვირვებლად დარჩენით, დასავლეთი ფაქტობრივად ხდება იმის თანამონაწილე, რასაც რუსეთის ჯარი უკრაინაში აკეთებს. ამასთან ის გამოთქვამს აზრს, რომ თუ პუტინს უკრაინაში ვერ გააჩერებენ, დასავლეთს მაინც მოუწევს ბრძოლა, ოღონდ თავის ტერიტორიაზე.

„უკრაინა ითხოვს რეალურ დახმარებას, ჩვენ ტელეეკრანებზე ვხედავთ აფეთქებებს საცხოვრებელ კვარტლებში და ვისმენთ განცხადებებს „უკრაინის მტკიცე მხარდაჭერის“ შესახებ. „მრცხვენია იმის მოსმენა, ნატო-ს ლიდერები და თანამდებობის პირები როდესაც საუბრობენ, რომ არ შეუძლიათ კონფლიქტში ჩართვა, მაგრამ შეგვეძლო ეს სირიაში, ლიბიაში, აფრიკაში, იუგოსლავიასა და ავღანეთში? უკრაინა დღეს იბრძვის არსებობისათვის და ევროპაში მშვიდობისთვის. და ჩვენ ამ დროს ვუყურებთ დამოუკიდებელი სახელმწიფოს ნგრევას? დიდება უკრაინას და მის გმირებს! ჯერ მხოლოდ მის გმირებს, რადგან სხვები ჰორიზონტზე არ ჩანან“, - განაცხადა დალია გრიბაუსკაიტემ.