ნავთობკომპანია Shell-ი რუსული ნავთობისა და გაზის შესყიდვაზე უარს ამბობს. ამის შესახებ კომპანიის განცხადებაშია ნათქვამი.

კომპანიის განცხადებით, შეწყდება რუსული ნედლი ნავთობის შეძენა და დაიხურება რუსეთში არსებული მომსახურების სადგურები და საავიაციო საწვავის წარმოება.

კომპანია ბოდიშს იხდის, გასულ კვირას განხორციელებული შესყიდვისთვის, რის გამოც ის უკრაინის საგარეო საქმეთა მინისტრმა, დმიტრო კულებამ მწვავედ გააკრიტიკა

„ეს რთული გამოწვევაა. ამ ნაწილში ენერგეტიკული სისტემის ცვლილება მოითხოვს შეთანხმებულ მოქმედებებს მთავრობის, ენერგიის მომწოდებლებისა და მომხმარებლების მხრიდან, ენერგომომარაგების სხვა ფორმაზე გადასვლა დიდხანს გაგრძელდება... ვაცნობიერებთ, რომ გასულ კვირას ჩვენი გადაწყვეტილება რუსული ნედლი ნავთობის პარტიის შეძენასთან დაკავშირებით, რომელიც ბენზინად და დიზელად უნდა გადამუშავდეს, იმის მიუხედავად,  რომ შეძენა განხორციელდა მიწოდების უსაფრთხოების გათვალისწინებით,  იყო შეცდომა და ბოდიშს ვიხდით“, - აცხადებს Shell.

5 მარტს ცნობილი გახდა, რომ სხვა კომპანიების მიერ რუსეთის ენერგორესურსებზე მასობრივი უარის მიუხედავად, ევროპის უმსხვილესმა ნავთობკომპანია Shell-მა რუსული ნავთობის უდიდესი პარტია რეკორდული ფასდაკლებით შეისყიდა, რასაც უკრაინის საგარეო საქმეთა მინისტრ დმიტრო კულებას მხრიდან მწვავე რეაქცი მოჰყვა.

„მითხრეს, რომ Shell-მა გუშინ ფარულად იყიდა რუსული ნავთობი. ერთი შეკითხვა მაქვს Shell-ის მიმართ: რუსულ ნავთობს თქვენთვის არ ასდის უკრაინული სისხლის სუნი? მოვუწოდებ ყველა შეგნებულ ადამიანს მთელ მსოფლიოში, მოითხოვოს ტრანსნაციონალური კომპანიისგან, გაწყვიტოს ყველანაირი საქმიანი კავშირი რუსეთთან“, - დაწერა კულებამ Twitter-ზე.