გერმანიის კანცერმა ოლაფ შოლცმა განაცხადა, რომ რუსეთის ხელისუფლებაში პანიკაა რუსული ნავთობის, გაზისა და ქვანახშირის იმპორტზე ევროკავშირისა და სხვა დასავლელი მოკავშირეების უარის გამო. ინფორმაციას უკრაინული მედია Politico-ზე დაყრდნობით ავრცელებს.

გამოცემის ცნობით, შოლცმა ევროკავშირის ლიდერებთან დახურულ შეხვედრაზე გამოსვლისას განაცხადა, რომ ევროპას შესაძლოა, ხუთი წელი დასჭირდეს, რათა რუსეთის ენერგომატარებლებისაგნ სრულად დამოუკიდებელი გახდეს.

მანამდე, ვიცე-კანცლერმა და ეკონომიკის მინისტრმა რობერტ ჰაბეკმა ბერლინში ჟურნალისტებს განუცხადა, რომ გერმანიის ენერგეტიკული კომპანიები ელვისებური სისწრაფით  უარს ამბობენ ნავთობისა და ქვანახშირის მიმწოდებელ რუსულ კომპანიებთან კონტრაქტებზე, ეს კი იმას ნიშნავს, რომ გერმანია რუსული ნავთობისა და ქვანახშირის იმპორტზე 2022 წლის ბოლომდე უნდა გათავისუფლდეს.  

თუმცა, ჰაბეკის თქმით,  გაზის იმპორტის შეწყვეტის შემთხვევაში ამ პროცესს გაცილებით ხანგრძლივი დრო დასჭირდება, სულ მცირე 2024 წლის შუა პერიოდამდე მაინც.

მისი განცხადებით, რუსეთის მოთხოვნა მის მიერ „არამეგობრულად“ გამოცხადებული ქვეყნების მიმართ, გაზის საფასური რუბლში გადაიხადონ, კონტრაქტის პირობებს ეწინააღმდეგება.

ამასთან, შეერთებულმა შტატებმა და ევროკავშირმა მიაღწიეს შეთანხმებას თხევადი ბუნებრივი აირის მიწოდების თაობაზე, რომლის მიზანია ევროკავშირის რუსულ ენერგომატარებლებზე დამოკიდებულების შემცირება.

ახალი შეთანხმების შესახებ აშშ-ის პრეზიდენტმა ჯო ბაიდენმა და ევროკომისიის პრეზიდენტმა ურსულა ფონ დერ ლაიენმა ბრიუსელში გამართულ ერთობლივ პრესკონფერენციაზე განაცხადეს.

შეთანხმების თანახმად, აშშ ევროკავშირს წლის ბოლომდე მიაწვდის სულ მცირე 15 მილიარდი კუბური მეტრ საწვავს. შეთანხმების მიზანია, მომავალში ეს რაოდენობა კიდევ უფრო გაიზარდოს, დაახლოებით 50 მილიარდ კუბულ მეტრამდე.