რუსი ჟურნალისტი, კრემლის პროპაგანდისტი ოლგა სკაბეევა აცხადებს, რომ "სპეციალური ოპერაცია" უკრაინაში დასრულდა და "მესამე მსოფლიო ომი" დაიწყო. ამის შესახებ მან ტელეარხ "როსია 1"-ის ეთერში, საკუთარ გადაცემაში განაცხადა.

მაყურებლებთან საუბრისას ოლგა სკაბეევამ განაცხადა, რომ რუსეთი ახლა ისეთი სიტუაციის წინაშე დგას, როდესაც მას ნატოს "დემილიტარიზაცია" მოუწევს.

"ალბათ დადგა დრო, რომ ვაღიაროთ, შესაძლოა, რომ რუსეთის სპეცოპერაცია უკრაინაში დასრულდა. იმ გაგებით, რომ ნამდვილი ომი დაიწყო. უფრო მეტიც, ეს არის მესამე მსოფლიო ომი", - თქვა მან.

"ჩვენ იძულებულნი ვართ არა მხოლოდ უკრაინის, არამედ მთელი ნატოს დემილიტარიზაცია მოვახდინოთ", - დასძინა პროპაგანდისტმა.