სასამართლომ თბილისში, არაყიშვილის ქუჩაზე დაჭრის საქმეზე დავით და გუგა კაკულიებს პატიმრობა შეუფარდა. გადაწყვეტილება თბილისის საქალაქო სასამართლოს მოსამართლემ, ჯემალ კოპალიანმა გამოაცხადა.

გამოძიება მათ ჯგუფურად მკვლელობის მცდელობას, ცეცხლსასროლი იარაღის და საბრძოლო მასალის ჯგუფურად, მართლსაწინააღმდეგო შეძენა-შენახვა-ტარებას, ასევე, საზღვრის უკანონოდ კვეთას ედავება.

პროკურატურის ცნობით, შსს-ის მიერ ჩატარებული გამოძიებით და მოპოვებული მტკიცებულებებით დადგინდა, რომ 27 მაისს, არაყიშვილისა და ფალიაშვილის ქუჩების კვეთაზე, ბრალდებულებმა ჯგუფურად, განზრახ მოკვლის მიზნით ცეცხლსასროლი იარაღიდან რამდენჯერმე გასროლის შედეგად ერთ პირს მრავლობითი დაზიანებები მიაყენეს.

პროკურატურის განცხადებით, გამოძიებით ასევე დადგინდა, რომ ბრალდებულებმა უკანონოდ გადმოკვეთეს საქართველოს სახელმწიფო საზღვარი, მართლსაწინააღმდეგოდ, ჯგუფურად შეიძინეს ცეცხლსასროლი იარაღი და საბრძოლო მასალა, რასაც ასევე მართლსაწინააღმდეგოდ ინახავდნენ მათ მიერ ნაქირავებ ბინაში.

დანაშაულები სასჯელის სახედ და ზომად 13-დან 17 წლამდე თავისუფლების აღკვეთას ითვალისწინებს.

დაცვის მხარემ დააყენა გირაოს შუამდგომლობა 10-10 ათასი ლარის ოდენობით, რაც სასამართლომ არ დააკმაყოფილა.

საქმეზე წინასასამართლო სხდომა 21 ივლისს ჩაინიშნა.

ძმები კაკულიები სამართალდამცველებმა გუშინ დილით ორთაჭალაში დააკავეს. პროკურატურამ დაკავებულებს ბრალდება რამდენიმე მუხლით წარუდგინა.

კაკულიები რამდენიმე გახმაურებულ კრიმინალურ გარჩევაში ფიგურირებენ. ერთ-ერთი ვერსიით, სწორედ მათ დაუკვეთეს ნიკო კვარაცხელიას მკვლელობა. ეს ვერსია ოფიციალურად დადასტურებული არ არის, თუმცა, მოკლული კვარაცხელიას ოჯახი აცხადებს, რომ დამნაშავეები დათა და გუგა კაკულიები არიან.