თუ პრეზიდენტი კარგად და სიღრმისეულად შეხედავს სურათს, ვფიქრობ, ძნელი დასანახი არ უნდა იყოს, რომ ქვეყანაში არიან პოლიტიკური ჯგუფის წარმომადგენლები, ვისთვისაც მნიშვნელოვანია, ქვეყანა ჩართული იყოს საომარ მოქმედებებში, საქართველოში მოეწყოს მეორე ბუჩა და მეორე ფრონტი გაიხსნას, - – ამის შესახებ საპარლამენტო უმრავლესობის წევრი ალუდა ღუდუშაურმა განაცხადა.

მისი თქმით, უმჯობესი იქნება, საქართველოს პრეზიდენტმა საკუთარ ხალხს აუხსნას, რას ნიშნავს ქვეყნის მიერ მეორე ქვეყნიდან ელჩის გაწვევა მაშინ, როცა უკრაინას არც ერთი სხვა ქვეყნიდან ელჩი არ გაუწვევია.

„ის, ვინც სალომე ზურაბიშვილს პრეზიდენტად არ მოიხსენიებდა და შეურაცხყოფის ქვეშ ამყოფებდნენ, ახლა, რატომღაც, ეს ადამიანები სხვა ნოტებზე საუბრობენ. უფლება დამიტოვეთ, რომ პრეზიდენტს რიგ საკითხებში არ დავეთანხმო. დიახ, დემოკრატია ის არის, რომ პრეზიდენტს ცალკეულ საკითხებზე თავის შეფასებები აქვს და ჩვენი შეფასებები განსხვავებულია. ობიექტური რეალობაა ის, რასაც ჩვენ ვამბობთ. თუ პრეზიდენტი კარგად და სიღრმისეულად შეხედავს სურათს, ვფიქრობ, ძნელი დასანახი არ უნდა იყოს, რომ ქვეყანაში არიან პოლიტიკური ჯგუფის წარმომადგენლები, ვისთვისაც მნიშვნელოვანია, ქვეყანა ჩართული იყოს საომარ მოქმედებებში, საქართველოში მოეწყოს მეორე ბუჩა და მეორე ფრონტი გაიხსნას... რაც შეეხება უკრაინას და ზელენსკის, უმჯობესი იქნება პრეზიდენტმა, როგორც ყოფილმა დიპლომატმა საკუთარ ხალხს აუხსნას და განმარტებები გააკეთოს, თუ რას ნიშნავს ქვეყნის მიერ მეორე ქვეყნიდან ელჩის გაწვევა მაშინ, როცა არც ერთი სხვა ქვეყნიდან ელჩი არ ჰყოლია გაწვეული, მათ დორის იმ ქვეყნებიდანაც კი, საიდანაც პირდაპირ ცეცხლი მიემართებოდა უკრაინის მისამართით.“, – განაცხადა დეპუტატმა.

სალომე ზურაბიშვილმა "პალიტრანიუსთან" ინტერვიუში განაცხადა, რომ არ არსებობს მეორე ფრონტის საფრთხე და არ არსებობენ ომის პარტიები საქართველოში. მისივე თქმით, საქართველო ალბათ არის ერთ-ერთი ქვეყანა ევროპაში იმ ცოტა ქვეყნიდან, სადაც ვოლოდიმირ ზელენსკის პარლამენტში სიტყვით გამოსვლის საშუალება არ მიეცა.