ჯანმრთელობის მოსფლიო ორგანიზაციამ მსოფლიოში მაიმუნის ყვავილის 780 ლაბორატორიულად დადასტურებული შემთხვევის შესახებ განაცხადა.  ამის შესახებ ნათქვამია ორგანიზაციის პრეს-რელიზში.

მაიმუნის ყვავილის შემთხვევები გამოვლინდა 27 ქვეყანაში, რომელიც ამ დაავადებისთვის ენდემური არ არის. როგორც ორგანიზაციის განცხადებაშია ნათქვამი, უმეტეს ქვეყანაში დაინფიცირება უკავშირდება კაცებს შორის სექსუალურ კონტაქტებს.

პაციენტების უმრავლესობამ განაცხადა, რომ იმოგზაურა ევროპისა და ჩრდილოეთ ამერიკის ქვეყნებში და არა დასავლეთ ან ცენტრალურ აფრიკაში, სადაც მაიმუნის ყვავილის ვირუსი ენდემურია.

2 ივნისის მონაცემებით, ჯანმო-ს არ დაუფიქსირებია გარდაცვალების შემთხვევები იმ ქვეყნებში, რომლებისთვისაც ის არატიპიურია, მაგრამ ენდემური ქვეყნებიდან კვლავ ვრცელდება ინფორმაციები ლეტალური გამოსავლების შესახებ.

ყველაზე მეტი - 58 ადამიანი დაიღუპა კონგოს დემოკრატიულ რესპუბლიკაში, სამი ადამიანი დაიღუპა კონგოში, გარდაცვალების ორ-ორი შემთხვევა დაფიქსირდა კამერუნში, ცენტრალური აფრიკის რესპუბლიკასა და ნიგერიაში - თითო-თითო. გლობალურ დონეზე ორგანიზაციაში დაავადების გამოვლენის გამო რისკები ფასდება როგორც „ზომიერი“.

მაისში ჯანმო-ს განსაკუთრებით საშიში პათოგენების ევროპული ბიუროს ხელმძღვანელმა რიჩარდ პებოდიმ განაცხადა, რომ მაიმუნის ყვავილით დაინფიცირების შემთხვევების მიუხედავად, მასობრივი ვაქცინაციის საჭიროება არ არსებობს. მისი თქმით, პირადი ჰიგიენის დაცვა და უსაფრთხო სქესობრივი კავშირი საკმარისია, რათა ინფექციის გავრცელება კონტროლს დაექვემდებაროს.