დავით ბერძენიშვილზე თავდასხმაში ბრალდებულს, ირაკლი ხომასურიძეს სასამართლომ აღკვეთის სახით, ორთვიანი წინასწარი პატიმრობა შეუფარდა. გადაწყვეტილება მოსამართლე ლაშა კლდიაშვილმა ცოტა ხნის წინ გამოაცხადა.

დაკავებულმა სასამართლო სხომაზე თქვა, რომ ინციდენტი დავით ბერძენიშვილის ძმის, ლევან ბერძენიშვილის მიერ მეფე ერეკლე მეორეზე გამოთქმული აზრის გამო დაიწყო.

"ქაშუეთის წინ ვიყავი, უნდა დამერეკა. ამ დროს გამოიარეს. პირველ რიგში გამახსენდა მისი ბედოვლათი ძმის განცხადებები... მე მათთან მივედი, რომ არასწორი ადამიანები ხართ მეთქი... ეს ბერძენიშვილი, მედია და მთლიანად ოპოზიცია არიან ქვეყნის მტრები. ისიც მინდოდა მეთქვა, შენს მაგივრად შენი ძმა რომ შემხვედროდა, პანღურს ვუთავაზებდი-მეთქი იმ სიტყვების გამო, რაც მან აკადრა ქართველ ხალხს. შემოტრიალდა და მითხრა ესე, ესეო. მე წავიწიე მისკენ და დავუწყე გინება. ჟურნალისტები რომ მოვიდნენ, მერე ჟურნალისტებსაც ვაგინებდი, ახლაც გავუმეორებ. მან [დავით ბერძენიშვილმა] მომიქნია პირველმა ხელი," - თქვა ირაკლი ხომასურიძე.

ბრალდებულის სიტყვების მოსმენის შემდეგ მოსამართლე ლაშა კლდიაშვილმა ირაკლი ხომასურიძე დარბაზიდან გააძევა.

"გულწრფელად მინდა ვთქვა, რომ ვაპირებდი გასვლას სათათბირო ოთახში , მართლა ხაზგასმით მინდა ვთქვა, რომ არ ვიყავი ჩამოყალიბებული რა გადაწყვეტილებას მივიღებდი , მაგრამ აღარ გავალ იმის გათვალისწინებით, რაც ბრალდებულის ნათქვამიდან, ქმედებებიდან გამომდინარე დავინახეთ- ეს კაცი არის ყველაზე გაბრაზებული, შესაბამისად თუ ასეთ გაბრაზებას აქ გამოხატავს და ჩემს მიერ არაერთი მოწოდებისა დაწყნარებულიყო, მაქსიმალურად ვეცადე დარჩენილიყო პროცესზე ბოლომდე, მაგრამ არ მომცა ამის საშუალება, აღნიშნულიდან გამომდინარე სასამართლომ მიიღო გადაწყვეტილება," - განმარტა მოსამართლემ.

თავდასხმა ხათუნა სამნიძესა და დავით ბერძენიშვილზე თბილისში,  რუსთაველის გამზირზე, 6 ივნისს მოხდა.