საქართველო ერთადერთი ქვეყანაა, რომელიც რამშტაინის ფორმატის შეხვედრაზეა მიწვეული, სადაც უკრაინის საკონტაქტო ჯგუფია, მიუხედავად იმისა, რომ საქართველო უკრაინას იარაღით ვერ ეხმარება, ამის შესახებ თავდაცვის მინისტრმა ჯუანშერ ბურჭუშლაძემ განაცხადა.

„ძალიან მნიშვნელოვანია საქართველოს მოწვევა ნატოს ყველა ფორმატში გამართულ შეხვედრებზე. ერთი წლის განმავლობაში უკვე მეოთხედ ვართ მოწვეული ნატოს მინისტერიალზე. დღეს პირველად მე დავესწრები რამშტაინის ფორმატში შეხვედრას, სადაც არის უკრაინის საკონტაქტო ჯგუფი. მიუხედავად იმისა, რომ საქართველო უკრაინას იარაღით ვერ ეხმარება, საქართველო ერთადერთი ქვეყანაა, რომელიც მაინც მიიწვიეს აღნიშნულ ფორმატში. ჩვენ ორმხრივი შეხვედრები გავმართეთ ფინეთთან, ბულგარეთთან და თურქეთთან. ჩვენ გვაქვს საერთო გამოწვევები. ვისაუბრეთ რუსეთიდან მომავალ საფრთხეებზე. ჩვენ დარწმუნებულები ვართ, რომ ერთობლივი ძალისხმევით საქართველოს ყველა ამოცანა გადაიჭრება“,- აღნიშნა ჯუანშერ ბურჭულაძემ.

დღეს ბრიუსელში გაიმართება უკრაინისთვის სამხედრო დახმარების გასაწევად მოქმედი საკონტაქტო ჯგუფის სხდომა, რომელსაც აშშ-ის თავდაცვის მინისტრი ლოიდ ოსტინი უხელმძღვანელებს.

შეხვედრას 45-ზე მეტი ქვეყნის თავდაცვის მინისტრი და გენშტაბის ხელმძღვანელი, ასევე ნატო-სა და ევროკავშირის წარმომადგენლები დაესწრებიან. 

აღნიშნულ ფორმატში პირველად მიიღებენ მონაწილეობას საქართველო, მოლდოვა და ეკვადორი. შეხვედრაზე იმსჯელებენ, ვის რა სამხედრო დახმარების აღმოჩენა შეუძლია უკრაინისთვის.