საქართველოს პრეზიდენტი სალომე ზურაბიშვილი საქართველოს მხარდაჭერის თხოვნით ევროკავშირის წევრი ქვეყნების ლიდერებს მიმართავს.

პრეზიდენტი ევროპელ ლიდერებს კანდიდატის სტატუსის მინიჭების საკითხში მხარდაჭერას სთხოვს.

სალომე ზურაბიშვილმა ევროკავშირის ქვეყნების პრეზიდენტებსა და პრემიერ-მინისტრებს როგორც წერილობით, ასევე ვიდეოგანცხადებებით მიმართა.

პრეზიდენტმა მიმართა პოლონეთის, ხორვატიის, გერმანიის, საფრანგეთის, ირლანდიის, იტალიის ბელგიის, დანიის, შვედეთის, ნიდერლანდების, ესტონეთის, საბერძნეთის, კვიპროსის, ავსტრიის და სხვა წევრი ქვეყნების ლიდერებს.

"ბატონო პრეზიდენტო, საქართველო და პოლონეთი იზიარებენ საერთო ტრაგიკულ წარსულს - ოკუპაციის, ევროპული ოჯახიდან მოწყვეტის წარსულს. მაშინ, როცა ევროპულმა საბჭომ ისტორიული გადაწყვეტილება უნდა მიიღოს, საქართველოს, როგორც ყოველთვის, აქვს პოლონეთის სოლიდარობის, მეგობრობის და ძმობის იმედი, რომ მხარს დაუჭერს ჩვენს ევროპისკენ მიმავალ გზას", - ამბობს პრეზიდენტი ანდჟეი დუდასადმი მიმართვაში.