ევროპული საბჭოს პრეზიდენტმა შარლ მიშელმა, გერმანიაში "დიდი შვიდეულის" სამიტის დაწყებამდე გამართულ პრესკონფერენციაზე, უკრაინაში გაჩაღებულ ომსა და კანდიდატის სტატუსთან დაკავშირებულ საკითხებზე ისაუბრა.

შარლ მიშელმა პირობა დადო, რომ საქართველოსა და ბოსნია და ჰერცეგოვინას მიენიჭებათ ევროკავშირის წევრობის კანდიდატის სტატუსი მას შემდეგ, რაც რეფორმებს განახორციელებენ.

ევროპული საბჭოს პრეზიდენტმა კიდევ ერთხელ აღნიშნა, რომ ევროპაში ისტორიული მომენტი დადგა, რამაც შესაძლებელი გახადა მოლდოვისა და უკრაინისთვის სტატუსის მინიჭება.

"ომი უკრაინაში ევროკავშირსაც გარდაქმნის. რამდენიმე დღის წინ, ევროკავშირის სამიტზე შევთანხმდით, რომ უკრაინას და მოლდოვას ევროკავშირის წევრობის კანდიდატის სტატუსს მივანიჭებთ და ასევე მზად ვართ, მივანიჭოთ კანდიდატის სტატუსი ბოსნიას და საქართველოს, როგორც კი რეფორმები შესრულდება. ეს არის ისტორიული მომენტი უკრაინისთვის და ევროპის მომავლისთვის", - განაცხადა მიშელმა.

ამასთან, შარლ მიშელმა ხაზგასმით აღნიშნა, რომ ევროკავშირი გააგრძელებს მტკიცედ დგომას უკრაინელი ხალხის გვერდის, უკრაინის სუვერენიტეტისა და ტერიტორიული მთლიანობის, ასევე ევროპული დემოკრატიული ღირებულებების დასაცავად.