ჩრდილოეთატლანტიკური ალიანსის მადრიდის სამიტზე მიიღეს ახალი სტრატეგიული კონცეფცია, რომელითაც ოფიციალურად შეიცვალა რუსეთის სტატუსი ალიანსთან ურთიერთოებაში.

ახალი სტრატეგიული კონცეფციის თანახმად, ნატო რუსეთს განიხილავს, როგორც ყველაზე სერიოზულ და უშუალო საფრთხეს მოკავშირეების უსაფრთხოებისთვის.

"რუსეთის ფედერაცია არის ყველაზე სერიოზული და პირდაპირი საფრთხე მოკავშირეების უსაფრთხოებისთვის და მშვიდობისა და სტაბილურობისთვის ევროატლანტიკურ რეგიონში", - ნათქვამია კონცეფციაში, რომელიც განსაზღვრავს ნატოს სტრატეგიას მომდევნო ათწლეულისთვის.

ამასთან, ალიანსი ხაზს უსვამს, რომ თავად არ ესწრაფვის რუსეთის ფედერაციასთან დაპირისპირებას და არ წარმოადგენს საფრთხეს რუსეთისთვის.

კონცეფცია არ აკონკრეტებს, მიიჩნევს თუ არა ალიანსი რუსეთს თავის მტრად თუ მოწინააღმდეგედ, მაგრამ მზად არის მისი მხრიდან აგრესიისთვის.

"არავის არ უნდა ეპარებოდეს ეჭვი ჩვენს ძალასა და მონდომებაში, დავიცვათ მოკავშირეთა ტერიტორიის ყოველი სანტიმეტრი, დავიცვათ მოკავშირეთა სუვერენიტეტი და ტერიტორიული მთლიანობა და დავძლიოთ ნებისმიერი აგრესორი“, - ნათქვამია დოკუმენტში.

დოკუმენტში ასევე აღნიშნულია, რომ რუსეთი იძულების, ფეთქებადი აქტივობისა და ანექსიის გზით ცდილობს გავლენისა და პირდაპირი კონტროლის სფეროების შექმნას.

"ის იყენებს ჩვეულებრივ, კიბერ და ჰიბრიდულ საშუალებებს ჩვენსა და ჩვენი პარტნიორების წინააღმდეგ. მისი აგრესიული სამხედრო პოზიცია და რიტორიკა, ისევე როგორც მისი დადასტურებული მზადყოფნა გამოიყენოს ძალა თავისი პოლიტიკური მიზნების მისაღწევად, ძირს უთხრის წესებზე დაფუძნებულ საერთაშორისო წესრიგს"“, - აღნიშნულია დოკუმენტში.

მანამდე, ნატო რუსეთის თავის სტრატეგიულ კონცეფციაში პარტნიორად მოიხსენიებდა.

ამავდროულად, ახალ სტრატეგიულ კონცეფციაში, ჩრდილოატლანტიკურმა ალიანსმა პირველად განსაზღვრა საკუთარი პოლიტიკა ჩინეთთან მიმართებაში.

კონცეფციაში აღნიშნულია, რომ ჩინეთის ამბიციები და იძულების პოლიტიკა წარმოადგენს გამოწვევას ნატო-ს ღირებულებების, ინტერესებისა და უსაფრთხოებისთვის.

"ჩინეთის სახალხო რესპუბლიკის გაცხადებული ამბიციები და იძულების პოლიტიკა გამოწვევაა ჩვენი ინტერესების, უსაფრთხოებისა და ღირებულებებისთვის. ჩინეთი იყენებს პოლიტიკურ, ეკონომიკურ და სამხედრო ინსტრუმენტების ფართო სპექტრს, რათა გაზარდოს თავისი გლობალური ყოფნა და წარმოაჩინოს ძალაუფლება, ამასთან დარჩეს გაუმჭვირვალე მისი სტრატეგიის, განზრახვებისა და სამხედრო გაძლიერების კუთხით. ჩინეთის ზიანის მომტანი ჰიბრიდული, კიბერ ოპერაციები, მისი კონფრონტაციული რიტორიკა და დეზინფორმაცია გამიზნულია მოკავშირეებისთვის და აზიანებს ალიანსის უსაფრთხოებას", – ნათქვამია სტრატეგიული კონცეფციის დოკუმენტში.

დოკუმენტში ასევე აღნიშნულია, რომ ჩინეთისა და რუსეთის სტრატეგიული პარტნიორობა საფრთხეს უქმნის ნატო-ს ღირებულებებს და ინტერესებს.

"ჩინეთის სახალხო რესპუბლიკასა და რუსეთის ფედერაციას შორის გაღრმავებული სტრატეგიული პარტნიორობა და მათი ურთიერთგაძლიერებული მცდელობები, დაარღვიონ წესებზე დაფუძნებული საერთაშორისო წესრიგი, ეწინააღმდეგება ჩვენს ღირებულებებსა და ინტერესებს", – აღნიშნულია დოკუმენტში.

ნატოს წინა სტრატეგიულ კონცეფციაში, რომელიც 2010 წელს ლისაბონში მიიღეს, ჩინეთი საერთოდ არ იყო ნახსენები.