დღეიდან, ჩეხეთი ევროკავშირის საბჭოს მორიგე თავმჯდომარე გახდა.

თავმჯდომარეობა ჩეხეთმა საფრანგეთისგან გადაიბარა. ევროკავშირის საბჭოს თავმჯდომარეობა ყოველ 6 თვეში, როტაციის პრინციპით გადაიცემა წევრ ქვეყნებს შორის.

თავმჯდომარეობის გადაბარების ფორმალური ცერემონია მადრიდში, ნატოს სამიტის ფარგლებში გაიმართა.

ევროპული საბჭოს პრეზიდენტ შარლ მიშელთან პრაღაში ერთობლივ პრესკონფერენციაზე, ჩეხეთის პრემიერ-მინისტრმა პეტრ ფიალამ დაასახელა ის პრიორიტეტები, რომელზედაც, თავმჯდომარეობის ფარგლებში, გეგმავს ფოკუსირებას.

ფიალას თქმით, შემდეგი 6 თვის განმავლობაში, პრაღას სურს კონცენტრირება მოახდინოს ისეთ საკითხებზე, როგორებიცაა: ლტოლვილთა კრიზისის მართვა და ომის შემდეგ უკრაინის აღდგენა; ენერგეტიკული უსაფრთხოება; ევროპის თავდაცვის შესაძლებლობებისა და კიბერუსაფრთხოების გაძლიერება; ევროპის ეკონომიკისა და დემოკრატიული ინსტიტუტების სტრატეგიული მდგრადობის გაძლიერება.

"ჩვენი თავმჯდომარეობის დევიზი იქნება, ყოფილი პრეზიდენტის ვაცლავ ჰაველის ციტატა " - "ევროპა, როგორც ამოცანა", - თქვა ფიალამ.

ჩეხეთის თავმჯდომარეობის პერიოდში პრაღა უმასპინძლებს ევროკავშირის ლიდერების არაფორმალურ სამიტს, რომლის მთავარი თემაც იქნება ახალი ევროპული გაერთიანება, რომელშიც ევროკავშირის არაწევრი ქვეყნებიც შევლენ.

არაფორმალური სამიტი 2022 წლის ოქტომბერში გაიმართება.