უზბეკეთის ხელისუფლებამ მთელი ქვეყნის მასშტაბით საგანგებო მდგომარეობა გამოაცხადა. ამის მიზეზი უზბეკეთში შემავალი ყარაყალპაკეთის ავტონომიურ რესპუბლიკაში, კერძოდ კი, მის დედაქალაქ ნუქუსში გამართული საპროტესტო აქცია გახდა.

ავტონომიური რესპუბლიკის ხელმძღვანელობამ განაცხადა, რომ ადგილი ჰქონდა ხელისუფლების მიტაცების მცდელობას.

რეგიონში საპროტესტო აქციები 1-ელ ივლისს უზბეკეთის კონსტიტუციის ახალი პროექტის გამოქვეყნების შემდეგ დაიწყო. ახალი პროექტის თანახმად  ,უქმდება ყარაყალპაკეთის სუვერენული სტატუსი და რესპუბლიკის შემადგენლობიდან გასვლის უფლება.

ყარაყალპაკეთს უზბეკეთის ტერიტორიის 40% უკავია და მასში დაახლოებით 2 მილიონი ადამიანი (უზბეკეთის მოსახლეობის 6,3%) ცხოვრობს.

გამოცემა „ხუკის “ ცნობით, 2 ივლისს აქტივისტი დაულეტმურატ ტაჟიმურატოვი დააკავეს, რომელიც ერთი დღით ადრე მიტინგზე სიტყვით გამოვიდა და შემდგომი აქცია 5 ივლისს დააანონსა.

ამასთან, ვრცელდება დაუზუსტებელი ინფორმაცია რეგიონში არეულობების შედეგად დაშავებულებისა და დაღუპულების შესახებ.

გუშინ, 2 ივლისს, ცნობილი გახდა რომ ნუქუსში ტაშკენტიდან ჩაფრინდნენ უზბეკეთის პრეზიდენტის შავქათ მირზიაევისა და პრემიერ-მინისტრ აბდულა არიპოვის თვითმფრინავები.

მირზიაევმა ყარაყალპაკეთის საკანონმდებლო ორგანოს დეპუტატები თვითნებობაში დაადანაშაულა და განაცხადა, რომ მათ ისე მიიღეს და დაამტკიცეს კონსტუტუციაში შესწორება, რომ პრეზიდენტს ხალხის უკმაყოფილების შესახებ არ აცნობეს.