დეპოლარიზაციის პირობებში გვაქვს ევროპისკენ ინტეგრაციის შანსი, ამ შემთხვევაში რა დროს მიხეილ სააკაშვილის ციხეში დატოვებაა, ან რა დროს „ქართული ოცნების“ ამომრჩევლის ნერვიულობაზე ფიქრია?! - ამის შესახებ ამის შესახებ პარლამენტის წევრმა, პარტია „გირჩის“ თავმჯდომარემ, იაგო ხვიჩიამ საქართველოს პირველი არხის გადაცემაში „დღის თემა“ განაცხადა.

მისი თქმით, იმ პუნქტის შესრულება, რომელსაც დეპოლარიზაცია ჰქვია, შეუძლებელია, თუ მიხეილ სააკაშვილი ციხეში იქნება.

„სინამდვილეში, ძალიან მარტივად არის საქმე. მე მიხეილ სააკაშვილის საზღვარგარეთ გადაყვანაზე კი არ ვნერვიულობ, ევროინტეგრაციის პროცესზე ვნერვიულობ და მიმაჩნია, რომ იმ პუნქტის შესრულება, რომელსაც დეპოლარიზაცია ჰქვია, შეუძლებელია იმ შემთხვევაში, თუ მიხეილ სააკაშვილი ციხეში ზის და ჩვენ რაც არ უნდა კანონები მივიღოთ, ამას არავინ არ ჩათვლის დეპოლარიზაციის პირობად. მესმის, რომ „ქართული ოცნებისთვის“ რთულია და ადვილი არ არის მიხეილ სააკაშვილის გაშვება, მაგრამ მეორე მხრივ, თუ აქეთ მხარეს დგას საკითხი, რომ ჩვენ, ხელისუფლება და ოპოზიცია ევროპელებთან ერთიანი პოზიციით უნდა მივიდეთ, მხოლოდ ეს გვაძლევს შანსს და მხოლოდ მართლა დეპოლარიზაციის პირობებში გვაქვს ევროპისკენ ინტეგრაციის შანსი, ამ შემთხვევაში რა დროს მიხეილ სააკაშვილის ციხეში დატოვებაა, ან რა დროს „ქართული ოცნების“ ამომრჩევლის ნერვიულობაზე ფიქრია?! სინამდვილეში ხომ სხვა რამე დგას დღის წესრიგში?!“, – განაცხადა ხვიჩიამ.