ძალიან ვწუხვარ იმ განცხადებების გამო, რაც კეთდება ამჟამად ამერიკის ელჩის მისამართით, - განაცხადა საქართველოს პრეზიდენტმა სალომე ზურაბიშვილმა დღეს გამართულ ბრიფინგზე. ამ ფორმით ის გამოეხმაურა აშშ-ის ელჩის კელი დეგნანის მიმართ კრიტიკას - მოსამართლე ლაშა ჩხიკვაძის მიერ.

მისი თქმით, დიპლომატიური წესი მოითხოვს, რომ მტკიცებულებების არსებობის შემთხვევაში, ელჩთან გაიმართოს ერთი ერთზე საუბარი და არა მედიის თანდასწრებით.

„არ შეიძლება, დღეს ამავე დროს, არ ვთქვა, რომ ძალიან ვწუხვარ იმ განცხადებების გამო, რომელიც კეთდება ამჟამად ამერიკის ელჩის მიმართ. მე არ მგონია, რომ ეს იყოს სწორი ფორმა. რამე მტკიცებულებები თუ არის, საერთოდ, დიპლომატიური წესი მოითხოვს, რომ ელჩთან გაიმართოს ერთი ერთზე საუბარი ამის შესახებ და არა ტელევიზიებით და მედიის საშუალებით განცხადებები. ჩვენი მეგობრები არიან ჩვენი მეგობრები და ჩვენ სხვა მეგობრები არ გვყავს“, – განაცხადა სალომე ზურაბიშვილმა.