წერილი კიდევ ერთხელ მიუთითებს, თუ როგორი პატრიოტია თავისი ქვეყნის ბატონი ბიძინა ივანიშვილი , - ამის შესახებ "ქართული ოცნების" დეპუტატმა, არჩილ თალაკვაძემ ბიძინა ივანიშვილის წერილზე Palitranews-ის ეთერში განაცხადა.

"ამ წერილში ორი მნიშვნელოვანი მომენტია. ჩემი აზრით და ჩვენი აზრით, პირველი - ეს გახლავთ, რა თქმა უნდა, ბატონი ბიძინა ივანიშვილის მხრიდან იმ კითხვებზე პასუხები, რომლებიც ბოლო პერიოდში არაერთხელ დაისვა. ეს წერილი კიდევ ერთხელ მიუთითებს, თუ რამდენად გულწრფელი დამოკიდებულება აქვს და თუ როგორი პატრიოტია თავისი ქვეყნის ბატონი ბიძინა ივანიშვილი. ის გამჭვირვალედ და ძალიან პირდაპირ ამბობს სიმართლეს, ეს ყოველთვის მისი ხელწერა იყო, როდესაც პოლიტიკაში გახლდათ და ახლაც, როცა პოლიტიკიდან გასულია, მისი ხელწერა იგივე რჩება [...] საზოგადოება დღეს უკვე ხედავს, თუ რა არის მშვიდობის ფასი. ხედავს, რა არის დემოკრატიული ინსტიტუტების ფასი და ხედავს, თუ რას ნიშნავს, როდესაც კერპთაყვანისმცემლობით კი არ იმართება ქვეყანა, არამედ ისე იმართება, როგორი კონცეფციაც ქართულმა ოცნებამ დაამკვიდრა", - თქვა თალაკვაძემ.

ბიძინა ივანიშვილმა დღეს გავრცელებულ წერილში განაცხადა, რომ "საქართველოსთვის და მისი ხელისუფლებისთვის ვითარებას განსაკუთრებით ართულებს ის გარემოება, რომ გარკვეული ძალები საქართველოს ომში ჩათრევას აქტიურად ცდილობდნენ და მათი ეს სურვილი და მიზანი, სამწუხაროდ, დღესაც აქტუალურია".

მისივე თქმით, აშშ-ის ელჩის თხოვნით, მასთან შეხვედრა 21 მარტს გაიმართა და ის დაახლოებით სამ საათს გაგრძელდა.