შვეიცარიული ბანკის, Credit Suisse-ის აღმასრულებელმა დირექტორმა თომას გოთშტაინმა თანამდებობა დატოვა.

ბანკის ახალ აღმასრულებელ დირექტორად ულრიხ კიორნერი დაინიშნა, რომელიც უფლებამოსილების განხორციელებას 1-ლი აგვისტოდან შეუდგება.

ამავდროულად, შვეიცარული ფინანსური ინსტიტუტი ყოვლისმომცველი სტრატეგიულ მიმოხილვას აანონსებს.

როგორც ბანკის მიერ გავრცელებულ პრესრელიზში ვკითხულობთ, ყოვლისმომცველი სტრატეგიულ მიმოხილვა განპირობებულია სხვადასხვა მიზნით. კერძოდ, მოქნილი ჯგუფის ჩამოყალიბება მნიშვნელოვნად დაბალი აბსოლუტური ხარჯების ბაზით, რომელსაც შეუძლია, უზრუნველყოს მდგრადი ანაზღაურება ყველა დაინტერესებული მხარისთვის და პირველი კლასის მომსახურება კლიენტებისთვის;  მსოფლიო დონის გლობალური სიმდიდრის მართვის ფრენჩაიზი გაძლიერება და სხვა.

შეგახსენებთ, Credit Suisse-თან რამდენიმე დავა აქვს "ქართული ოცნების" დამფუძნებელს, ბიძინა ივანიშვილს. ერთ-ერთი დავა, რომელიც ბანკის ყოფილი თანამშრომლის მიერ მოპარულს თანხებს უკავშირდებოდა, ივანიშვილმა მარტში მოიგო, რის შედეგადაც, ბერმუდის სასამართლოს გადაწყვეტილებით, ბანკს ივანიშვილის სასარგებლოდ, 500 მლნ დოლარის გადახდა დაეკისრა.

ბიძინა ივანიშვილი 2011 წლიდან ედავება Credit Suisse-ს ბანკის თანამშრომლის მიერ მითვისებული თანხის დასაბრუნებლად.

იმ დროისთვის ბიძინა ივანიშვილი კერძო საბანკო მომსახურების სფეროში Credit Suisse-ის კლიენტი იყო. სწორედ მაშინ გავრცელდა ინფორმაცია, რომ ბანკის თანამშრომელი პატრის ლესკოდრონი იპარავდა დიდძალ თანხას შვეიცარული ბანკის კონფიდენციალური ანგარიშებიდან, მათ შორის ივანიშვილისა და რუსი ოლიგარქის ვიტალი მალკინის ანგარიშებიდან.

შვეიცარიული მარეგულირებელი Finma-ს მამხილებელი ანგარიშის თანახმად, რომელიც მოულოდნელად გამოქვეყნდა გასული წლის თებერვალში, Credit Suisse-მა არ მიიღო ზომები მრავალი გაფრთხილებისა და ასობით საეჭვო ტრანზაქციის მტკიცებულების, ასევე ოთხი ფორმალური დისციპლინური სამართალწარმოების მიუხედავად.

ივანიშვილმა რამდენიმე საჩივარი შეიტანა შვეიცარიაში და უჩივლა Credit Suisse-ის ბერმუდის შვილობილ კომპანიას სასამართლო პროცესზე გასული წლის ნოემბერსა და დეკემბერში ქვეყნის უზენაეს სასამართლოში.

Credit Suisse დიდი ხნის განმავლობაში ამტკიცებდა, რომ ლესკოდრონი იყო წარმატებული თაღლითი ოპერატორი, რომელიც დაუღალავად მუშაობდა ზემდგომებისა და კოლეგებისგან თავისი უკანონო საქმიანობის დასამალად. თავად პატრის ლესკადრონი 2018 წელს სისხლის სამართლის წესით გასამართლდა და 2020 წელს ვადამდელი გათავისუფლების შემდეგ, თვითმკვლელობით დაასრულა სიცოცხლე. ბანკი, შვეიცარიაში განხილულ საქმეში ლესკოდრონის წინააღმდეგ, აღიარებული იქნა დაზარალებულ მხარედ.