ამერიკის ომის შემსწავლელ ინსტიტუტში (ISW) აცხადებენ, რომ კრემლი უკრაინას, ყირიმში, ნოვოფედოროვკას აეროდრომის დაბომბვაში ვერ დაადანაშაულებს, რადგან ეს იქნება რუსული საჰაერო თავდაცვის სისტემების არაეფექტიანობის მტკიცებულება, როგორც ეს უკვე მოხდა რუსული კრეისერის "მასკვას" ჩაძირვის დროს.

„ორ განსხვავებულ ადგილზე აფეთქებების ერთდროულობა, სავარაუდოდ, გამორიცხავს შემთხვევითი ცეცხლის ოფიციალურ რუსულ ვერსიას, მაგრამ არ გამორიცხავს არც დივერსიას და არც შორი მანძილის სარაკეტო დარტყმას, ამბობენ", - ISW-ის ექსპერტები.

ISW წერს, რომ უკრაინამ, შესაძლოა, "ნეპტუნის" ტიპის რაკეტების მოდიფიცირება მოახდინა სახმელეთო გამოყენებისთვის (როგორც რუსებმა გააკეთეს ხომალდსაწინააღმდეგო და საზენიტო რაკეტებთან დაკავშირებით), მაგრამ ამ ჰიპოთეზის დამადასტურებელი მტკიცებულება ამ დროისთვის არ არსებობს.

შეგახსენებთ, როდესაც „ნეპტუნის“ ტიპის უკრაინულმა ხომალდსაწინააღმდეგო რაკეტებმა რუსეთის ფედერაციის შავი ზღვის ფლოტის სარაკეტო კრეისერ „მასკვას“ დაარტყეს, რუსეთის თავდაცვის სამინისტრომ განაცხადა, რომ იქ „ტყვიაწამალი აფეთქდა“.

რუსეთის მიერ ანექსირებულ ყირიმის ნახევარკუნძულზე მდებარე ავიაბაზაზე აფეთქებები გუშინ, 9 აგვისტოს მოხდა. ადგილობრივი ოფიციალური პირების ცნობით, დაშავებულია ხუთი ადამიანი. მოსკოვი ამტკიცებს, რომ ეს არ არის უკრაინული მხრიდან თავდასხმა და აფეთქება ბაზაზე, იარაღის საწყობში მოხდა.

აფეთქებები ყირიმის დასავლეთ სანაპიროზე მდებარე ბაზაზე, ქალაქ ნოვოფედოროვკის მახლობლად მოხდა. იქ განლაგებულია რუსეთის საჰაერო კოსმოსური ძალების 43-ე გამანადგურებელი საავიაციო პოლკი, რომელიც ძირითადად შედგება Su-30SM, Su-33 თვითმფრინავებისა და Su-24M ბომბდამშენებისგან.