უკრაინაში ომის გაჩაღების გამო, რუსეთის წინააღმდეგ დაწესებული ფართომასშტაბიანი სანქციების ფონზე, მიმდინარე წელს თურქმეთმა რუსული ნავთობის იმპორტი გააორმაგა. იტყობინება სააგენტო Reuters-ი.

თურქეთში რუსეთიდან ყოველდღიურად 200 ათას ბარელზე მეტი ბარელი მიედინება, მაშინ როდესაც შარშან, ეს მაჩვენებელი ანალოგიურ პერიოდში 98 ათას ბარელს შეადგენდა.

თურქეთის ნავთობგადამამუშავებელმა ქარხნებმა Tüpraş-მა და STAR-მა წელს მნიშვნელოვნად გაზარდეს რუსული ნავთობის Urals-ისა და Siberian Light-ის შესყიდვები, მაშინ როდესაც შეამცირეს ჩრდილოეთის ზღვის, ერაყისა და დასავლეთ აფრიკის პროდუქციის შესყიდვები.

STAR-ი წლის დასაწყისიდან დაახლოებით დღეში 90 000 ბარელ რუსულ ნედლეულს ყიდულობს, შარშანდელ 48 ათას ბარელთან შედარებით. Tüpraş-ი დღეში დაახლოებით 111 ათას ბარელს, შარშანდელ 45 ათას ბარელთან შედარებით.

მიუხედავად იმისა, რომ ერდოღანი მკაცრად გმობს რუსეთის მიერ უკრაინაში გაჩაღებულ ომს, უარს ამბობს რუსეთისთვის სანქციების დაწესებაზე. მეტიც, ანკარა რუსეთსა და თურქეთს შორის ეკონომიკური ურთიერთობების გაღრმავებას ესწრაფვის.

Financial Times-ის ცნობით, დასავლეთის ქვეყნები არ გამორიცხავენ თურქეთის წინააღმდეგ სადამსჯელო ზომების შემოღებას რუსეთთან ურთიერთობის გაღრმავების ფონზე.

ამასთან, რამდენიმე დღის წინ, Politico-მ გაავრცელა ინფორმაცია, რომლის თანახმადაც, ვაშინგტონმა შესაძლოა, მოსთხოვოს ამერიკულ კომპანიებს, გავიდნენ თურქეთიდან, თუ ანკარა მოსკოვთან დაახლოებას გააგრძელებს.