„ქართული ოცნების“ წევრი არჩილ თალაკვაძე უკრაინაში, ბროვარში მომხდარის გამო მწუხარებას გამოთქვამს.

„უკიდურესად დამწუხრებული ვარ ბროვარში ვერტმფრენის გამანადგურებელი კატასტროფის გამო, რომელსაც ამდენი ადამიანის სიცოცხლე ემსხვერპლა, მათ შორის ბავშვების. ჩემი ღრმა სამძიმარი მსხვერპლთა ოჯახებს. გამაგრდი, უკრაინა“, – წერს თალაკვაძე „ტვიტერში“.

უკრაინის უსაფრთხოების სამსახურის თანახმად, წინასწარი ინფორმაციით, დაიღუპა სულ მცირე 16 ადამიანი, მათ შორის 3 ბავშვი. კიევის ოლქის სამხედრო ადმინისტრაციის ხელმძღვანელ ოლექსი კულებას ცნობით, დაღუპულია -18. ჰოსპიტალიზებულია 30 ადამიანი, მათ შორის 12 ბავშვი. დაღუპულთა შორის არის შინაგან საქმეთა სამინისტროს ხელმძღვანელობა – შინაგან საქმეთა მინისტრი დენის მონასტირსკი, მისი პირველი მოადგილე ევგენი ენინი და სამინისტროს სახელმწიფო მდივანი იური ლუბკოვიჩი.