უკრაინული მედია ქალაქ ბახმუტიდან ფოტორეპორტიორების კონსტანტინ და ვლად ლიბეროვების ფოტოებს ავრცელებს. რუსული პროპაგანდის მიუხედავად, ციხესიმაგრე ბახმუტი გმირულად დგას.

როგორც libkos-ი Instagram-ზე წერს ოკუპანტები ბახმუტს ყველა შეიარაღებიდან უტევენ. ქალაქის ნაწილი მიწასთან არის გასწორებული, მაგრამ მისი დაცვა გრძელდება.

„უძლეველი ციხესიმაგრე, რუსული პროპაგანდის ხმამაღალი განცხადებების მიუხედავად, დგას. და იქ ჯოჯოხეთია, ბახმუტს ბომბავენ ყველანაირი იარაღიდან, ქალაქი ცეცხლშია, ზოგიერთი რაიონი მთლიანად განადგურებულია“, -აღნიშნავენ ფოტორეპორტიორები.

უწყვეტი ცეცხლის მიუხედავად, ქალაქის დაცვა გრძელდება, ის მნიშვნელოვანია, როგორც მომავალი კონტრშეტევისთვის, ისე რეგიონისა და ქვეყნის შემდგომი დაცვისთვის.

რუსეთის ძალები ბახმუტის შტურმს განაგრძობენ, მაგრამ საბრძოლო შეტაკებები მნიშვნელოვნად არის შემცირებული. თუმცა იმის თქმა, რომ ოკუპანტები ნაკლებად უტევენ, ჯერ ნაადრევია. უკრაინული მედია აღნიშნავს, რომ საჭიროა მტრის მოქმედებების დეტალური ვერიფიკაცია და ანალიზი. შესაძლოა, რუსები ახდენდნენ რეზერვების შეცვლას.

ამ დღეებში ბრიტანეთის დაზვერვაში განაცხადეს, რომ ბახმუტზე  რუსების შეტევა თითქმის შეჩერებულია რუსული ჯარების გამოფიტვის გამო.

ამასთან, უკრაინის შეიარაღებული ძალების აღმოსავლეთ ჯგუფის სპიკერმა სერგეი ჩერევატიმ განაცხადა, რომ ჯერ ნაადრევია საუბარი ბახმუტის რაიონში რუსული ჯარის შეტევის სრული შეწყვეტის შესახებ. ქალაქი საბრძოლო მოქმედებების ეპიცენტრად რჩება.