თურქეთის ქაჰრამანმარაშის პროვინციას, სადაც თებერვალში დამანგრეველი მიწისძვრა მოხდა, თავს ძლიერი შტორმი დაატდა, რომელსაც მსხვერპლი მოჰყვა, არიან დაშავებულებიც.

თურქეთის ჯანდაცვის მინისტრის ფაჰრეთინ ქოჯას ინფორმაციით, 1 ადამიანი დაიღუპა და 50 დაშავდა მოულოდნელი ძლიერი შტორმისა და გადაუღებელი წვიმების შედეგად პროვინციის ფაზარჯიკის რაიონში.

უამინდობა მოულოდნელად დაიწყო. შტორმმა გადაუარა კარვების ქალაქს, სადაც მიწისძვრისგან დაზარალებულები ცხოვრობდნენ.

ძლიერმა ქარმა შენობებს სახურავები გადახადა, რომლებიც კარვების ქალაქს დაეცა, მოგლიჯა ხეები, დაზიანდა ავტომობილები.

5 აპრილს თურქეთის შინაგან საქმეთა მინისტრმა სულეიმან სოილუმ განაცხადა, რომ მიწისძვრის შედეგად დაზარალებული 2,6 მლნ ადამიანი კარვებში ცხოვრობს.

თებერვალში დამანგრეველ მიწისძვრას თურქეთსა და სირიაში 52 ათასზე მეტი ადამიანი ემსხვერპლა.