ამერიკის  შეერთებული შტატები დარწმუნებულია უკრაინის კონტრშეტევის წარმატებაში, რომელიც გააძლიერებს კიევის პოზიციებს ომის დასრულებასთან დაკავშირებით მომავალ ნებისმიერ მოლაპარაკებებზე.

ამის შესახებ აშშ-ის სახელმწიფო მდივანმა ენტონი ბლინკენმა პრესკონფერენციაზე განაცხადა.

ბლინკენმა აღნიშნა, რომ საუბარია უკრაინის შეტევის პირველ დღეებზე, ამიტომ ჯერ ძალიან ადრეა საუბარი, მის შედეგებზე.

„50-ზე მეტი სახელმწიფოს მიერ უკრაინის მხარდაჭერის, ასევე უკრაინელი ხალხისა და უკრაინელი სამხედროების სიმამაცისა და გამძლეობის შედეგად, დარწმუნებული ვართ, რომ ისინი გააგრძელებენ წარმატებებს ტერიტორიების დაბრუნებაში, რომლებიც მათ რუსეთმა წაართვა“, - განაცხადა ბლინკენმა.

აშშ-ის სახელმწიფო მდივნის თქმით, უკრაინის დახმარება დასავლელი მოკავშირეების მხრიდან გრძელვადიან პერსპექტივაში მიმართულია მშვიდობის დამყარებისკენ, რომელიც უნდა იყოს სამართლიანი და ხანგრძლივი.

„კონტრშეტევაში წარმატება ორ რამეს მოიტანს: გააძლიერებს აშშ-ს პოზიციას ნებისმიერ მოლაპარაკების მაგიდასთან, თუ ამის შესაძლებლობა გაჩნდება და შესაძლოა პუტინი აიძულოს საბოლოოდ ფოკუსირდეს მოლაპარაკებებზე მის მიერ დაწყებული ომის დასასრულებლად“, - განაცხადა ბლინკენმა.

ბლინკენის თქმით, სწორედ ამიტომ აშშ გააგრძელებს უკრაინის დახმარებას დღეს, რათა მან შეძლოს წარმატება ბრძოლის ველზე, ასევე იმუშავებს დახმარების სხვა ფორმებზე, რათა უკრაინამ შეძლოს გახდეს წარმატებული სახელმწიფო.