აშშ უკრაინას პირველად გადასცემს სანქცირებული რუსი ოლიგარქებისთვის ჩამორთმეულ აქტივებს. ამის შეახებ შეერთებული შტატების სახელმწიფო მდივანმა, ენტონი ბლინკენმა კიევში უკრაინის საგარეო საქმეთა მინისტრთან ერთობლივ პრესკონფერენციაზე განაცხადა.

„უსაფრთხოების სფეროში უკრაინის საჭიროებების გარდა, პირველად ჩვენ გადავცემთ უკრაინას სანქცირებული რუსი ოლიგარქებისთვის ჩამორთმეულ აქტივებს, რომელთა გამოყენებაც ახლა მოხდება უკრაინელი ვეტერანი სამხედროების მხარდასაჭერად. ის, ვინც ხელს უწყობდა პუტინის აგრესილ ომს, ამისთვის უნდა გადაიხადოს“, – განაცხადა ენტონი ბლინკენმა.

მისივე თქმით, აშშ-ს მტკიცედ აქვს გჰადაწყვეტილეიო უკრაინასთან ერთად სვლა.

“აშშ-ში, მტკიცედ გვაქვს გადაწყვეტილი, გავაგრძელოთ თქვენთან ერთად სვლა. პრეზიდენტმა ბაიდენმა მთხოვა, მოვსულიყავი და მტკიცედ დამედასტურებინა ჩვენი მხარდაჭერა, რათა უზრუნველვყოთ, მაქსიმალური ძალისხმევა, რასაც ჩვენ და სხვა ქვეყნები ვაკეთებთ კონტრშეტევის ამოცანების დაუყოვნებლივ გადაწყვეტისთვის, ასევე უკრაინის დასახმარებლად გრძელვადიან პერსპექტივაში, რათა უკრაინამ შეძლოს, შექმნას ძალა მომავლისთვის, რომელსაც ნებისმიერი მომავალი აგრესიის შეკავება და მისგან თავის დაცვა შეუძლია",- თქვა ბლინკენმა.

უკრაინული მედიის ცნობით, საუბარია 5,4 მილიონ დოლარზე, რომლებიც ვეტერანთა რეაბილიტაციასა და მხარდაჭერას მოხმარდება.

ასევე, კიევში ვიზიტისას ენტონი ბლინკენმა უკრაინისთვის ერთი მილიარდი დოლარის ოდენობის დახმარების ახალი პაკეტის შესახებ გამოაცხადა.