"ბათუმელებისა" და "ნეტგაზეთის" დამფუძნებელი მზია ამაღლობელი კლინიკა "ვივამედიდან" პენიტენციურ დაწესებულებაში დაუყოვნებლივ დაბრუნებას ითხოვს. ინფორმაციას "ბათუმელები" ამაღლობელის ადვოკატ ჯუბა ქათამაძეზე დაყრდნობითა ავრცელებს.

ჯუბა ქათამაძის თქმით, "ვივამედის" კლინიკურმა დირექტორმა ზურაბ ჩხაიძემ განაცხადა, რომ ამაღლობელს დღეს დამატებითი კვლევები ჩაუტარდება და ამის შემდეგ გადაწყდება, როდის დააბრუნებენ სასჯელაღსრულების დაწესებულებაში.

"მისი ჯანმრთელობის მდგომარეობა სტაბილურია. შიმშილობის 25-ე დღეა და რა თქმა უნდა, შესუსტებულია. აქვს ჯანმრთელობის გარკვეული პრობლემები, თუმცა თავს მხნედ გრძნობს. აცხადებს, რომ ბრძოლას აგრძელებს იმით, რითაც შეუძლია. ხილულად, რაც მე შეიძლება შევაფასო, რაიმე განსაკუთრებული პრობლემა არ აქვს. „ვივამედში“ ჩაუტარდა გარკვეული სახის კვლევები. შევხვდი ექიმებს და როგორც მითხრეს, რაღაც განსაკუთრებული პრობლემები ჯერჯერობით არ არის ანალიზებში", - განაცხადა ჯუბა ქათამაძემ.

მისი თქმით, დაცვის მხარეს გადმოეცა „ვივამედში“ ჩატარებული კვლევების შედეგები და მას სხვა ექიმებთანაც გადაამოწმებენ.

"მზია ისევ აცხადებს, რომ შიმშილობს არა მარტო თავის თავისთვის, არამედ ყველა პოლიტიკური პატიმრისთვის. მისი თხოვნაა, შიმშილობა შეწყვიტოს ყველა ადამიანმა, ვინც მზიას სოლიდარობისთვის შიმშილობს. მხოლოდ და მხოლოდ ეს ამძიმებს მას. ასევე მითხრა, რომ ის ცინიკური განცხადებები, რომელიც მმართველი გუნდის მხრიდან ესმის მის შიმშილობაზე, უფრო მეტად ძალის მიმცემია მისთვის, რომ შიმშილობა გააგრძელოს. ჩვენ ვთხოვთ შეწყვიტოს შიმშილობა, თუმცა გვიწევს პატივი ვცეთ მის გადაწყვეტილებას", - განაცხადა ჯუბა ქათამაძემ და დასძინა, რომ მზია ამაღლობელის თხოვნაა, მისი შიმშილობა არ იყოს წინა პლანზე.

"დღეს მოითხოვა, დაუყოვნებლივ დააბრუნონ პენიტენციურ დაწესებულებაში. აქ დარჩენა არ უნდა. როგორც ზურა ჩხაიძემ მითხრა, განმეორებითი კვლევები უნდა ჩაუტარდეს, შემდეგში გადაწყდება, როდის გადაიყვანენ პენიტენციურში", - დასძინა ადვოკატმა.

მზია ამაღლობელი 25 დღეა შიმშილობს. ის კვლევებისთვის "ვივამედში" გუშინ, 4 თებერვალს გადაიყვანეს.