20 ივნისის საქმეზე აუცილებელია არა იმის გამოძიება, პოლიციელებმა რატომ გამოიყენეს სპეციალური საშუალებები, არამედ რატომ მოხდა საპოლიციო ოპერაციის ისე დაგეგმვა, რომ ადამიანები დაშავდნენ, – ამის შესახებ საქართველოს პარლამენტის პირველმა ვიცე-სპიკერმა, გია ვოლსკიმ განაცხადა.

„პროვოკაციების მთელი წყობა იყო, გავრილოვიც იქ არ უნდა აღმოჩენილიყო, სადაც აღმოჩნდა. ძალიან მობილიზებული, სწრაფი კონტრშეტევა და რეაგირება გააკეთეს იმ პოლიტიკურმა სუბიექტებმა, რომლებიც პარლამენტში იმყოფებოდნენ, მომზადებულები, დროშებით, პლაკატებით დარბაზში შემოცვივდნენ. ესეც ეჭვებს ბადებდა, მაგრამ როგორც სტრასბურგის სასამართლომ დაადგინა, დღის წესრიგში რაიმე ანგარიშსწორების თემაა არ არის. აუცილებელია არა იმის გამოძიება, პოლიციელებმა რატომ გამოიყენეს საშუალებები, ეს სახელმწიფოს ლეგიტიმური უფლებაა, როდესაც შეტევა ბრუტალურია, არამედ ის, რატომ მოხდა საპოლიციო ოპერაციის ისე დაგეგმვა, რომ თავად პოლიციელები სერიოზულად დაშავდნენ, საათების განმავლობაში მათზე შეტევა მიმდინარეობდა, როდესაც შეიძლებოდა, სხვანაირად დაგეგმილიყო. ადამიანებს მიადგათ ფიზიკური ზიანი, მათ სიცოცხლეს და ცხოვრებას კვალი დაამჩნია. ქვეყანას ამ საკითხის გამოძიების ვალდებულება არ მოხსნია, უახლოეს პერიოდში შესაბამისი დასკვნები უნდა დაიდოს,“ – განაცხადა გია ვოლკსიმ.