ანკარაში მომხდარ აფეთქებაზე პასუხისმგებლობა რადიკალურმა შეიარაღებულმა დაჯგუფებამ ”თავისუფალი ქურთისტანის ქორებმა” აიღეს.

შესაბამისი განცხადება ორგანიზაციის საიტზე გამოქვეყნდა. მასში თურქეთი ფაშისტურ ქვეყნად არის დასახელებული, აფეთქება კი - ქურთების წინააღმდგ თურქეთის სამხედრო ოპერაციის საპასუხოდ.

ქურთი მებრძოლები აღნიშნავენ, რომ ტერაქტი მიმართული იყო უსაფრთხოების ძალებისა და არა სამოქალაქო პირების წინააღმდეგ.

ტერორისტები თურქეთის ხელისუფლებას ახალი აფეთქებებით ემუქრებიან.

ანკარის ცენტრში, ავტობუსების სადგურზე დანაღმული ავტომობილი 13 მარტს აფეთქდა. დაიღუპა 37 ადამიანი, 125 კი - დაშავდა.

შეგახსნებთ, რომ ანკარაში ანალოგიური აფეთქება თებერვალშიც მოხდა, რომელსაც 30 ადამიანი ემსხვერპლა. პასუხისმგებლობა მომხდარზე მაშინაც დაჯგუფება ”თავისუფალი ქურთისტანის ქორებმა” აიღეს.