ჟურნალისტი გიორგი ფარესიშვილი მისი პირადი ცხოვრების ამსახველი კადრების გამავრცელებელთა ვინაობას ასახელებს. პროკურატურაში დაკითხვის შემდეგ, მან ჟურნალისტებთან განაცხადა, რომ აღნიშნულ კადრებს ფლობდნენ გიორგი მამაცაშვილი, გელა ხვედელიძე და ნუგზარ ფოფხაძე. მისივე თქმით, აღნიშნულის მტკიცებულებად, გააჩნია აუდიოჩანაწერი, რომელსაც გამოძიებას გადასცემს.

„ერთ-ერთი ადამიანი არის შევარდნაძისდროინდელი ყოფილი, ასე ვთქვათ, რუხი კარდინალი, ნუგზარ ფოფხაძე, რა თქმა უნდა, გელა ხვედელიძე და ე.წ. ჟურნალისტი, გიორგი მამაცაშვილი.
ნუგზარ ფოფხაძის და გელა ხვედელიძის დავალებით მოხდა ამ კადრების გავრცელება. აუდიო ჩანაწერზეა საუბარი, სადაც ფოფხაძე ამბობს, რომ ეს ფირი გვაქვს ჩვენ. არ გამოვრიცხავ, რომ ამ ადამიანებს, ასევე, ჰქონდეთ დღემდე წვდომა და ჰქონდეთ გარკვეული ბაზა სხვადასხვა, ასობით ამ ჩანაწერის. მე დავინახე, რომ გამოძიებას აქვს გამოძიების ინტერესი, განსხვავებით 2013 წლიდან, როცა არ არსებობდა სურვილი საქმე ბოლომდე მიეყვანათ. მაშინ რომ ბოლომდე მისულიყო ეს საქმე, დღეს ამ შედეგს არ მივიღებდით", - განაცხადა ფარესიშვილმა.