გენერალ-მაიორმა ვახტანგ კაპანაძემ ლატვიურ მხარეს საქართველოს პოლიტიკური და პრაქტიკული მხარდაჭერისთვის მადლობა გადაუხადა. განსაკუთრებული ყურადღება გამახვილდა ნატო-საქართველოს არსებითი პაკეტის განხორციელების დროსა და ვარშავაში დაგეგმილ სამიტზე ლატვიის მხარდაჭერის მნიშვნელობაზე. მხარეებმა რეგიონში არსებული უსაფრთხოების გარემოც განიხილეს.

თავდაცვის სამინისტროსა და გენერალურ შტაბში გამართული შეხვედრების შემდეგ საქართველოს თავდაცვის სამინისტროს დელეგაცია ეროვნული გვარდიის შტაბს ესტუმრა, სადაც გვარდიის მეთაურმა ბრიგადის გენერალმა ლეონიდს კალნინსმა სტუმრებისთვის სპეციალური ბრიფინგი გამართა. შეხვედრას საქართველოს თავდაცვის სამინისტროს კიბერუსაფრთხოების ბიუროს ხელმძღვანელი ანდრია გოცირიძე დაესწრო. მხარეებმა ლატვიასა და საქართველოს შორის კიბერუსაფრთხოების სფეროში თანამშრომლობის განვითარების საკითხებზე იმსჯელეს.

გენერალური შტაბის უფროსის შეფასებით, ლატვიაში ვიზიტი ძალიან ნაყოფიერი და საინტერესო იყო.

„შეხვედრები მეგობრულ ვითარებაში მიმდინარეობდა. მოვისმინეთ საინტერესო ბრიფინგი უსაფრთხოების საკითხებთან დაკავშირებით, დავსახეთ ურთიერთობის შემდგომი განვითარების გზები. საინტერესო შეხვედრა გვქონდა ლატვიის გვარდიაში, სადაც ასევე გაერთიანებულია კიბერუსაფრთხოების დეპარტამენტი. ლატვიის გვარდიასთან, კიბერუსაფრთხოების მიმართულებით, ქართველი და ლატვიელი სპეციალისტების შემდგომი თანამშრომლობაც დაიგეგმა“, - განაცხადა გენარალ-მაიორმა ვახტანგ კაპანაძემ.

ვიზიტის ფარგლებში საქართველოს შეიარაღებული ძალების გენერალური შტაბის უფროსმა პოლკოვნიკ ოსკარს კალპაკსის მემორიალი გვირგვინით შეამკო და ლატვიის შეიარაღებული ძალების სამხედრო ბაზა დაათვალიერა.