ბათუმში მთელი ღამის განმავლობაში გადაუღებლად წვიმდა. ბათუმის მერიის ინფორმაციით, მიუხედავად ამისა, ქალაქის არცერთი ქუჩა არ დატბორილა.

„გამოძახება არ დაფიქსირებულა სახანძრო დაცვისა და საგანგებო სიტუაციათა მართვის სამსახურშიც. ქალაქში მთელი ღამის განმავლობაში, საგანგებო რეჟიმში მუშაობდნენ მერიის შესაბამისი სამსახურები. სპეცტექნიკის საშუალებით განუწყვეტლივ იწმინდებოდა ზღვაში გამსვლელი არხები. უმნიშვნელო წყლის დაგროვების ფაქტები დაფიქსირდა გორგილაძის ქუჩის ბოლოში, ჭავჭავაძის #78-ის მიმდებარედ და პუშკინის ქუჩაზე, რაც ძლიერი ქარის გამო ცხაურების დანაგვიანებამ გამოიწვია. აღნიშნულ მონაკვეთებზე დაუყოვნებლივ განხორციელდა გაწმენდითი სამუშაოები. დღეს დილით, მხოლოდ ერთი გამოძახება დაფიქსირდა შპს ,,ბათუმის წყლის“ ცხელ ხაზზე თამარის დასახლებაში სადაც დაფიქსირდა სანიაღვრე ჭის გაჭედვა. ადგილზე გასულმა საგანგებო ჯგუფმა უკვე განახორციელა გაწმენდითი სამუშაოები. ამ დროისთვის ქალაქში სტაბილური მდგომარეობაა. ზღვაში გამსვლელი არხები ღიაა. ქალაქის ქუჩებში პატრულირებენ შპს ,,ბათუმის წყლის“ ბრიგადები”, აცხადებენ ბათუმის მერიაში.