თბილისის საკრებულოს ფრაქცია ,,ნაციონალური მოძრაობის’’ თავმჯდომარე, სევდია უგრეხელიძე მიიჩნევს, რომ მანამდე, სანამ საკრებულოს იურიდიული კომისიის ხელმძღვანელი, თედო კობახიძე არ დაამტკიცებს, რომ არ ყოფილა გარეული შესაძლო კორუფციულ ფაქტებში, მანამდე ის თანამდებობას უნდა ჩამოცილდეს.

,,ასეთი ადამიანების თანამდებობებზე ყოფნა თავისთავად მიუთითებს, რომ ეს ოჯახური კლანები როგორც მოქმედებენ, აბსოლუტურად დაუსჯელად და ამავე დროს, მათი თაღლითობის მასშტაბები ფართოდან სულ დაბალ დონებმდე არის ჩამოსული და 300-400 ლარის აღებაზეც კი არ უკადრისობენ.

სანამ რამე გაირკვევა და სანამ დაამტკიცებს თედო კობახიძე თავის სიმართლეს და ძალიან მეეჭვება, რომ ეს ოდესმე მოხდეს, მანამ იგი აუცილებლად უნდა იქნეს ჩამოცილებული თანამდებობას. ეს არის სირცხვილი’’, - აცხადებს სევდია უგრეხელიძე.

თედო კობახიძე საკრებულოში იურიდიული კომისიის ხელმძღვანელია და ის ასევე პარლამენტის ვიცე-სპიკერის, მანანა კობახიძის ძმაა.

შეგახსენებთ, რომ თედო კობახიძე საკრებულოს ყოფილმა თანამშრომელმა, ბადრი ჯავახიშვილმა ფულის გამოძალვაში დაადანაშაულა.

თავად თედო კობახიძე ბრალდებებს ცილისწამებად აფასებს.