პროფკავშირების საერთაშორისო კონფედერაციის (ITUC) 2016 წლის გლობალური ანგარიშის მიხედვით, დასაქმებულთა უფლებრივი მდგომარეობა მსოფლიოს უმეტეს ქვეყნებში გაუარესდა. საქართველოში არსებული მდოგმარეობა წინა წლებთან შედარებით მცირედით გაუმჯობესებულია, თუმცა საქართველო იმ ქვეყნების კატეგორიაში შედის, სადაც შრომითი უფლებები რეგულარულად ირღვევა.

ინდექსის შედგენისას ქვეყნები 5 კატეგორიად არის დაყოფილი, საქართველოსთან ერთად მესამე კატეგორიაში მოხვდნენ ავსტრალია, ბულგარეთი, ჩილე, ხორვატია, ისრაელი, უნგრეთი, იამაიკა, ყაზახეთი, ნეპალი, რუსეთი, სინგაპური, ესპანეთი, ტანზანია, ვენესუელა.

საქართველოს შესახებ ანგარიშში მოხვდა კაზრეთში მიმდინარე მოვლენები. საერთაშორისო პროფკავშირების გაერთიანება აღნიშნავს, რომ RMG GOLD-მა დასაქმებულების მიმართ დისკრიმინაციული მცდელობა გაატარა.

"კაზრეთს პრაქტიკულად კომპანია RMG GOLD აკონტროლებს, სადაც მოსახლეობის უმეტესობა აღნიშნული კომპანიის თანამშრომელია. გასულ წელს იყო შემთხვევები, როდესაც დასაქმებულები საუბრისგან თავს იკავებდნენ, რადგან ეშინოდათ, რომ ისინიც და მათი ოჯახის წევრების სამსახურიდან იქნებოდნენ გათავისუფლებულები. კომპანიამ უარყო ეკოლოგიური დაბინძურების და დასაქმებულების ჯანმრთელობის რისკები ოქროს მოპოვების პროცესში“, - აღნიშნულია  ანგარიშში.

გარდა კაზრეთისა, პროფკავშირების საერთაშორისო კონფედერაცია ყურადღებას უთმობს საქართველოს რკინიგზის შემთხვევასაც. ანგარიშში წერია, რომ თანამშრომელთა შორის პრემიების გაცემისას ბალანსი არ იყო დაცული და მათი ნაწილი გაცილებით მაღალ პრემიას იღებდა, სხვა დასაქმებულებთან შედარებით.