დღეს საქართველოს პარლამენტში ადამიანის უფლებების დაცვისა და სამოქალაქო ინტეგრაციის და იურიდიულ საკითხთა კომიტეტების გაერთიანებულ სხდომაზე პერსონალურ მონაცემთა დაცვის ინსპექტორის თანამდებობაზე ასარჩევად წარდგენილ კანდიდატებს თამარ ქალდანს და ნიკოლოზ ლეგაშვილს მოუსმინეს.

კანონმდებლობით დადგენილი წესის შესაბამისად, მთავრობის საპარლამენტო მდივანმა შალვა თადუმაძემ კომიტეტის წევრებს კანდიდატები წარუდგინა და მათი ბიოგრაფიები გააცნო.

თამარ ქალდანმა თავის გამოსვლაში სხვა საკითხებთან ერთად, ასევე ისაუბრა საკანონმდებლო რეფორმის გაგრძელების, საზოგადოების ცნობიერების ამაღლებისა და მოქალაქეთა ინფორმირების ზრდის მნიშვნელობაზე.

„ჩემთვის დიდი პატივი იყო ამ თანამდებობის დაკავება და მქონდა საშუალება მთავრობასთან, პარლამენტთან და არასამთავრობო ორგანიზაციებთან ერთად ვყოფილიყავი რეფორმის მონაწილე, რომელიც ქვეყანაში პერსონალური მონაცემების დაცვის მყარი გარანტიების შექმნას ემსახურებოდა“ - აღნიშნა თამარ ქალდანმა.

მეორე კანდიდატმა ნიკოლოზ ლეგაშვილმა პარლამენტარებს მისი ხედვები გააცნო: ისაუბრა ტექნოლოგიური პროგრესის პირობებში მოქალაქეთა უფლებების დაცვის მექანიზმებსა და საზოგადოებასთან და მონაცემთა დამმუშავებლებთან მუშაობის გაგრძელების აუცილებლობაზე.

საკომიტეტო განხილვის პროცესში კანდიდატებმა უპასუხეს დეპუტატების შეკითხვებს, რის შემდეგაც კენჭისყრა გაიმართა. ადამიანის უფლებათა დაცვისა და სამოქალაქო ინტეგრაციის კომიტეტის 8 წევრმა მხარი თამარ ქალდანის კანდიდატურას დაუჭირა, 4-მა წევრმა ნიკოლოზ ლეგაშვილის წინააღმდეგ მისცა ხმა, იურიდიულ საკითხთა კომიტეტის 7-მა დეპუტატმა მხარი თამარ ქალდანის კანდიდატურას დაუჭირა, 4-მა დეპუტატმა ნიკოლოზ ლეგაშვილის წინააღმდეგ მისცა ხმა, ხოლო 4 ბიულეტენი გაბათილდა.

საკომიტეტო განხილვის შემდეგ კანდიდატებს პარლამენტის პლენარულ სხდომაზე უყრიან კენჭს.

პერსონალურ მონაცემთა დაცვის ინსპექტორს პარლამენტი 3 წლის ვადით ირჩევს. 2013 წლიდან დღემდე ამ თანამდებობას თამარ ქალდანი იკავებს.