დასრულდა გიორგი კვირიკაშვილისა და ანგელა მერკელის პირისპირ მოლაპარაკება. მხარეებმა ერთობლივი ბრიფინგი გამართეს. 

ანგელა მერკელის განცხადებით, ქართულ-გერმანულ ორმხრივ ურთიერთობებზე ილაპარაკეს. 

"კარგია, რომ 2017 წელი ქართულ-გერმანული მეგობრობის წლად გამოცხადდა. 2018 წელს საქართელო ფრანკფურტის წიგნის ბაზრობაზე იქნება წარმოდგენილი, როგორც სტუმარი ქვეყანა. გერმანია თანამშრომლობს საქართველოსთან ევროკავშირის ფარგლებში, პროექტების ფარგლებში ნატოს შიგნით. ჩვენ ინტერესით ვადევნებთ თვალს ეკონომიკურ რეფორმებს და საქართველოში ეკონომიკის ლიბერალიზაციას,"- განაცხადა მერკელმა. 

მერკელის თქმით, გიორგი კვირიკაშვილთან შეხვედრის დროს ასოცირების შეთანხმების შესახებ იმპლემენტაციაზე ისაუბრეს. მერკელის განცხადებით, ეკონომიკური კავშირები გაიზარდა. 

ანგელა მერკელის განცხაებით, კარგია, რომ საქართველო პრაგმატულ ნაბიჯებს დგამს რუსეთთან, მისი თქმით, გერმანია საქართველოს ტერიტორიულ მთლიანობას მხარს უჭერს, მისი თქმით, ამაში მოიაზრება სამხრეთ ოსეთი და აფხაზეთი.

ანგელა მერკელმა დღევანდელ ბრიფინგზე ვიზალიბერალიზაციაზეც ისაუბრა. 

"ევროკომისიამ დაადგინა, რომ საქართველომ ყველა კრიტერიუმი შეასრულა ვიზალიბერალიზაცისთვის. დღეს ლაპარაკია იმაზე, როდის მივიღებთ ჩვენ საბოლოო გადაწყვეტილებას ვიზალიბერალიზაციის შესახებ. მე წინა კვირასაც სატელეფონო საუბარში ვილაპარაკე ამაზე, რომ ჩვენ ვიზალიბერალიზაციას განვიხილავთ შეჩერების მექანიზმის კონტექსტში. ამას არ აქვს მაინცდამაინც საქართველოსთან უშუალო კავშირი, არამედ ზოგადად, თუკი დიდი სირთულეები წარმოიქმნება, მაგალითად, რომელიმე ქვეყნის ძალიან ბევრი მოქალაქე ჩამოვა და ევროკავშირში მოითხოვს პოლიტიკურ თავშესაფარს, როგორც გასულ წელს სერბეთთან გვქონდა შემთხვევა, ამის განმეორება რადგან არ გვინდა, ვისწრაფვით შეჩერების მექანიზმისკენ. ეს საკითხი ახლა ევროპარლამენტმა უნდა გადაწყვიტოს და მე დიდი იმედი მაქვს, რომ ძალიან მალე იქნება კენჭისყრა ევროპარლამენტში საქართველოს მოქალაქეებისთვის ვიზალიბერალიზაციის მინიჭებაზე,"- განაცხადა ანგელა მერკელმა.