იუსტიციის მინისტრი თეა წულუკიანი არგენტინის რესპუბლიკაში სამუშაო ვიზიტით იმყოფება. 22 ივნისს დაგეგმილია შეხვედრა არგენტინის იუსტიციის მინისტრ ხერმან გარავანოსთან.

თეა წულუკიანი არგენტინელ კოლეგას ქვეყანაში განხორციელებულ რეფორმებს გააცნობს. შეხვედრაზე საუბარი იქნება ორმხრივ თანამშრომლობაზე, ადამიანის უფლებების ეროვნულ სტრატეგიაზე, ანტიდისკრიმინაციული კანონის შესახებ, სასამართლო რეფორმის სამივე ტალღაზე, პროკურატურის რეფორმაზე, ღია მმართველობის პარტნიორობის ფარგლებში საქართველოს წარმატებაზე, ბავშვთა უფლებების დასაცავად გატარებულ საკანონმდებლო რეფორმებსა და არასრულწლოვანთა მართლმსაჯულების კოდექსზე, ასევე, ოჯახში ძალადობის წინააღმდეგ შემუშავებულ საკანონმდებლო ცვლილებებსა და მოქალაქეებისთვის მიწის რეგისტრაციისას ბარიერების მოხსნაზე.

გარდა ამისა, თეა წულუკიანი შეხვდება  ექსპერტებს, ანტიკორუფციული სახელმწიფო სამსახურის უფროსს, ადამიანის უფლებათა სახელმწიფო მდივნის მოადგილეს. დაგეგმილია მინისტრის სტუმრობა არგენტინის გენერალურ არქივში და შეხვედრა არგენტინის მოდერნიზაციის მინისტრ ანდრეს იბარასთან. ანდრეს იბარას თეა წულუკიანი ინფორმაციას მიაწვდის იუსტიციის სახლების და საზოგადოებრივი ცენტრების კონცეფციისა და მათი მუშაობის სპეციფიკის შესახებ. ამ კონტექსტში მასპინძლები გაეცნობიან სახელმწიფო სერვისების ხელმისაწვდომობის კუთხით საქართველოში არსებული მდგომარეობას.

იუსტიციის მინისტრის ვიზიტი არგენტინაში 25 ივნისს დასრულდება.