საქართველოს საგანგებო და სრულუფლებიანმა ელჩმა თეა ახვლედიანმა, ესტონეთის რესპუბლიკის პრეზიდენტთან ტოომას ჰენდრიკ ილვესთან ერთად, პრეზიდენტის საზაფხულო რეზიდენციის ტერიტორიაზე მიმდინარე წლის 20 ივნისს ხე დარგო. ხის დარგვის ცერემონია შედგა ესტონეთის პრეზიდენტის საზაფხულო რეზიდენციაში, „არმას ფერმაში", ტოომას ჰენდრიკ ილვესის მოწვევით, ტალინში აკრედიტებული დიპლომატიური კორპუსის ყოველწლიური ტრადიციული ვიზიტის ფარგლებში.

საქართველოს ელჩის მიერ დარგულმა მუხამ ბინა დაიდო „არმას ფერმაზე", სადაც ესტონეთის ევროკავშირსა ნატო-ში გაწევრიანების შემდეგ, საფუძველი ჩაეყარა ხეების დარგვის სიმბოლურ ტრადიციას. სხვადასხვა დროს „არმას ფერმის" ტერიტორიაზე დარგულია ხეები ევროკავშირისა და ნატო-ს წევრი ქვეყნების სახელმწიფო მოღვაწეების, ამავე ქვეყნების ზოგიერთი ელჩის, ასევე, ესტონეთის მთავრობის, დამსახურებული მოღვაწეებისა და საპატიო სტუმრების მიერ. ესტონეთის პრეზიდენტმა აღნიშნა, რომ საქართველო პირველია „აღმოსავლეთ პარტნიორობის" ქვეყნებს შორის, რომელიც ზემოხსენებულ ტრადიციას შეუერთდა. თეა ახვლედიანმა განაცხადა, რომ ესტონეთის პრეზიდენტის საზაფხულო რეზიდენციაში ხის დარგვა საქართველოსა და ესტონეთს შორის არსებული განსაკუთრებული მეგობრობის კიდევ ერთი დადასტურებაა.