"რას ლაპარაკობთ, გგონიათ, ვიყიდეთ მატარებელი და გვირაბში არ ეტევა?", - ასე გამოეხმაურა ეკონომიკის მინისტრი დიმიტრი ქუმსიშვილი ორსართულიან მატარებელთან დაკავშირებით გავრცელებულ ჭორებს.

“ორსართულიანი მატარებლები, რომლებიც საქართველოს რკინიგზამ შეიძინა, არის ძალიან მაღალი ხარისხის და მაღალი კლასის. ასეთი მატარებლები ჩვენ არ გვყოლია. ტექნიკური შესაბამისობა არის სრულად შემოწმებული და მოლაპარაკებები, მათ შორის ტექნიკურ დონეზე, მიმდინარეობდა საკმაოდ დიდი ხნის განმავლობაში. რა თქმა უნდა, შესყიდვა არ ხდება ისე, თუ არ არის შესაბამისობაში. ტექნიკურ ნაწილში მნიშვნელოვანი სამუშაოები ჩატარდა და ყიდვის გადაწყვეტილება დეტალური საბუთების მიხედვით იქნა მიღებული. სხვა შემთხვევაში, ამ მატარებლების ყიდვის დროს, ჩვენ 4-5 მლნ. დოლარით მეტის გადახდა მოგვიწევდა, რაც დღეს დავზოგეთ. ასეთი მატარებლები ჩვენ არ გვყოლია და ვიმედოვნებ, რომ თქვენც [ჟურნალისტები] იმგზავრებთ ამ მატარებლებით. აბა, როგორ გგონიათ, რომ ჩვენ წავედით და ვიყიდეთ მატარებელი, რომელიც გვირაბში არ ეტევა? თქვენ წარმოგიდგენიათ რას ლაპარაკობთ საერთოდ? ასეთი რაღაც შეიძლება იკითხოთ?", - განაცხადა დიმიტრი ქუმსიშვილმა.