აჭარის მთავრობის თავმჯდომარე სამთავრობო კომისიების მუშაობას აფასებს. როგორც არჩილ ხაბაძე განმარტავს, შერეული სამთავრობო კომისიები აჭარის მთავრობის უწყებებში სხვადასხვა მიმართულებით პრობლემური საკითხების შესწავლისა და რეკომენდაციების გაცემის მიზნით  უკვე რამდენიმე წელია მუშაობს.

„აღნიშნული კომისიები ცალკეული პრობლემების მიხედვით ეტაპობრივად ყალიბდება და არის ქმედითი და შედეგზე ორიენტირებული. კომისიების დასკვნების დაფუძველზე აჭარის მთავრობის თავმჯდომარის გადაწყვეტილებით არაერთი სოციალური პრობლემის მოგვარება მოხდა. ბათუმის საკრებულოს მიერ ახლახანს მიღებული გადაწყვეტილება გონიოს მიწების შესახებ 2010 წლის დოკუმენტის ბათილად ცნობის შესახებ, სწორედ შერეული სამთავრობო კომისიის რეკომენდაციების საფუძველზე იქნა მიღებული. აჭარის მთავრობის ძალისხმევით, 271 გონიოელს მიწის საკუთრებაში დარეგისტრირების შესაძლებლობა მიეცა“, აცხადებს არჩილ ხაბაძე.

მისივე განმარტებით, 2012-2016 წლებში სტიქიით მიყენებული ზარალის სალიკვიდაციო კომისიის მიერ 1732 ოჯახს გაეწია დახმარება, ხოლო 213 ოჯახს გადაეცა ბინა.

„მნიშვნელოვანი შედეგია 2014-2016 წლებში ათწლეულების განმავლობაში არსებული პრობლემის გადაჭრა - 196 ოჯახს სახცოვრებელი ფართი დაუკანონდა ე.წ სამხედრო ბინებში.

სამთავრობო კომისიის დასკვნის საფუძველზე, შუახევში, 2015 წელს 300 000 ლარის კომპენსაცია გაიცა სოფელ ჩანჩხალოს მოსახლეობისთვის.

ასევე მნიშვნელოვანია 1989 წლის 19 აპრილის სტიიქიის შედეგად დაზარლებულ წაბლანისა და წაბლიანის მოსახლეობისთვის გაწეული დახმარება. აჭარის მთავრობის მუშაობის შედეგად 25 წელიწადზე მეტ ხანს დაკონსერვებული პრობლემა საბოლოოდ გადაიჭრა და 200-ზე მეტი ოჯახისთვის ბათუმში საცხოვრებელი სახლის მშენებლობა მიმდინარეობს.

სოციალური მიმართულებით  ღონისძიებების ხელშესაწყობად შექმნილი შერეული  სამთავრობო კომისიები აქტიურად აგრძელებენ მუშაობას. ხშირ შემთხვევაში, არსებული კომისიები არასამთავრობო ორგანიზაციების ჩართულობით წარმოადგენენ ერთგვარ შუამავალ რგოლს სხვადასხვა პრობლემური  საკითხების გადაჭრაში“. ამბობს აჭარის მთავრობის თავმჯდომარე.